Sebezohlonyiswa ngolwazi ngaphambi kokuklonyeliswa ngeyezamabhizinisi

OSOMABHIZINISI abasafufusa abakhele uMasipala wesiFunda Ugu sebethole ingqayizivele yethuba elingabasiza ukuchumisa amabhizinisi abo njengoba inkampani ehlela imicimbi yokuthuthukisa umphakathi - Umlando Creatives, isimemezele ukuthi umcimbi wanonyaka wezindondo zosomabhizinisi i-The Next Billionaire Business Awards, uzokwendlalelwa wuhlelo okuhloswe ngalo ukusiza labosomabhizinisi ukucaba indlela eya empumelelweni.

Lokho kuhlaluke esithangamini nabezindaba sokwethula izinhlelo zalo mcimbi, okhuza ibuya okwesithupha nonyaka, ebesiso-Ugu Sports & Leisure Centre, eGamalakhe, ePort Shepstone, ogwini oluseningizimu yeKwaZulu-Natal obungoLwesine ntambama. .

UNksz Lungile Mbili wenkampani Umlando Creatives uthe sebehlele ukuthi umcimbi wokuklomelisa osomabhizinisi abasafufusa emikhakheni ewu-20 yezamabhizinisi ehlukene uzokwendlalelwa yi-The Next Billionaire Business Expo, ezoba ngoDisemba 4, ngaphambi kokuba  kube wusuku lo mcimbi wokuklomelisa ngezindondo ngoDisemba 5, endaweni efanayo.

"Lokhu sikwenze ngoba sibona ukuthi nakuba osomabhizinisi bethu besizakala ngale miklomelo esibanikeza yona kepha futhi basasalele emuva ngolwazi lwezinye izinto ezimqoka nezingaba wusizo emabhizinisini abo. Yingakho sizoqala ngalo mbukiso wosomabhizinisi ozobe ugabe ngezinhlaka ezahlukene ezibhekele ukusiza osomabhizinisi ngamasu nangamathuba okuchumisa amabhizinisi abo," usho kanje.

Eqhuba, uthe bazokwamukela osomabhizinisi abakhele uMasipala uGu abawu-50 ngalolo suku lombukiso wosomabhizinisi, kanti kowezindondo kuqokwe osomabhizinisi abawu-60 emnxeni ewu-20 eyahlukene yezamabhizinisi, okuzosiza ngokubakhuthaza ukuchumisa amabhizinisi abo nokuthi kuvuleke amathuba ezinye izinto ezinkulu ezingenza bachume.

"Okunye esibheke ukukwenza ngalezi zinhlelo wukuqhuba umbono wethu wokuthi kusizakale osomabhizinisi bendawo, futhi bathole ithuba lokumaketha nokuqhakambisa imisebenzi emihle abayenzayo, okuzogcina kuba wusizo nangokwakha amathuba omsebenzi endaweni yethu ngokuqhubeka kwesikhathi," kusho uNksz Mbili.

UMqondisi woPhiko lwezokuSebenza eMnyangweni wokuThuthukisa uMnotho, ezokuVakasha nokoNgiwa kweMvelo, uMnuz Nhlanhla Mpondi, uthe kuyajabulisa ukubona abantu abasha beqhubeka nezinhlelo ezinjena eziwusizo ekufukuleni umnotho.

"Yingakho nathi siqoke ukubuya nakulo nyaka ukuzoxhasa lo mbono okwesibili ngoba sikholelwa ekutheni uwusizo kakhulu ukufukula umnotho walesi sifunda nesifundazwe sonke jikelele, kanti futhi sizoqhubeka sibeke eqhulwini ukutusa nokugqamisa izinhlelo ezifuze lolu ukuze kusizakale osomabhizinisi nomnotho wethu," kusho uMpondi.

Sekuvele sekuvuliwe ukuvotela abaqokwe kule minxa yezamabhizinisi kusukela manje kuyoze kuvalwe ngoNovemba 14. Ukuvota kubiza uR3 umqhafazo ngamunye, kanti kuvumeleke ukuvota noma yikangaki kusomabhizinisi omthandayo ukumsiza anqobe indondo.

Eminye iminxa ebhekwe kakhulu ngowe-Top Achievers lapho okuqokwe khona i-Ayanda Holdings, i-Phili's Bakery and Restaurant, Amandlenkosi Farms ne-Limitless Expression Designs.

Kwi-Best Businesswoman of The Year kuqhathwe uLondiwe Nyawo we-Vital Derma Radiance, Amanda Eve Mseleku we-Eve's Lounge noSinazo Mpomane weMabillion's Deco Company.

Kwi-Best Businessman of The Year kuqhathwe uXolani Shandu we-African Wild Travel, Vusi Sibiya weSibiya Funeral Services noSifiso Hadebe weMakhulukhulu Protection.

Eminye iminxa yamabhizinisi ekhona ngeye-Content Creator of The Year, Business in Sport, Tourism and Hospitality, Best Cosmetics Manufacturing Business, Best Top Achiever, Best Therapeutic Business, Best Mobile Cafe, Best Manufacturing Business, Best Industrial Sewing Business, i-Best Digital Media Business, i-Best Food & Beverage Business, i-Best Cleaning & Hygiene Business, Best Emerging Business, Best Culinary Arts Busimess, Best Beauty & Image Consulting Business ne-Best Agriculture Business.