Kuhlehle umcimbi kuhlonishwa obeyinxusa lakuleli eFrance

INDUMEZULU yaminyaka yonke iNdoni Saliwa Music Festival ebizoba seSiyabonga Sangweni Sports Complex eDondotha ngoMgqibelo, ihlehliselwe u-Okthoba 18 ngenxa yokudlula emhlabeni kobeyiNxusa lakuleli eFrance, uMnuz Nathi Mthethwa.

Lezi zindaba ziqinisekiswe yiMeya yakuMasipala waseMfolozi, uMnuz Xolani Bhengu, ngokubambisana nabagqugquzeli balo mcimbi uNdoni Ndunakazi nomfowabo, uSaliwa Ndunakazi. UBhengu uthe bathathe lesi sinqumo emuva  kokumenyezelwa kosuku lomngcwabo kaMthethwa ongowakwesaKwaMthethwa kuMasipala waseMfolozi.

"Umasipala uhlanganyela nesizwe sonke ekudluliseni amazwi enduduzo emndenini wakwaMthethwa kanye nasekuhlonipheni impilo yomholi ohloniphekile owenze umehluko omkhulu ezweni. Umcimbi iNdoni Saliwa Music Festival uhlale uyinkundla ebalulekile yokukhuthaza amakhono endawo, ukukhulisa intsha kanye nokugubha isiko lethu." UMthethwa (58) udlule emhlabeni ngesonto eledlule nokusolwa ukuthi uzibulele ngokuziphonsa esuka esitezi sika-22 ehhotela laseParis iHyatt Regency. Uzohlonishwa ngomngcwabo kahulumeni  kwesaKwaMthethwa ngeSonto.  

USaliwa uthe ngaphandle kokuthi uMthethwa ubeyiNxusa lakuleli kodwa ubeyilungu lasebukhosini bakwaMthethwa kule ndawo okuzobanjelwa kuyo umcimbi wabo. 

"Lokhu kuholele ekutheni kungabibikho umcimbi ophasiswayo endaweni yakwaMthethwa ngaleso sikhathi. Sidlulisela amazwi enduduzo emndenini wakwaMthethwa, ebukhosini nasemphakathini wonke, ngefu elimnyama elisigubuzele. Siyaxolisa kakhulu kunoma yikuphi ukuphazamiseka okubangelwe yilokhu, futhi siyabonga ngokuzwisiswa nangokweseka kwenu okuqhubekayo."

UBhengu uthe umasipala uqinisekisa ukuzibophezela kwawo ekwesekeni lo mcimbi ukuze uphumelele ngosuku olusha oluhleliwe.

"Sibonga ukuqonda nokubambisana ngalesi sikhathi sokuzila kwezwe."

USaliwa unxusa abathandi bomculo ukuba batheleke ngobuningi babo kusukela ngo-3 ntambama kuze kulamule ukuphuma kwelanga ngakusasa ngoba baqinisekisile ukuthi babophela zonke izintandokazi.

Kubaculi abazobe besina bededelana kubalwa uMafikizolo, Menzi, Khuzani, Mthandeni SK, Sgwebo Sentambo, Inkosi Yamagcokama, Bahubhe, Ithwasa Lekhansela, Thandeka Hadebe, Luve, Njabulo Langa, Maqhinga Hadebe, Gatsheni, Ntencane, Dr Buselaphi nabanye abaningi. Amathikithi asatholakala ngoR150 kuya kuR5000 eComputicket nasezitolo zakwaShoprite Checkers.