Konke kumi ngomumo ngowe-Africa Travel Indaba

UYAQALA ngoMsombuluko umbuthano wezohwebo kwezokuvakasha i-Africa's Travel Indaba.

Lo mbuthano uvame ukuqala ngenkundla yokuxhumana kosomabhizinisi i-BONDay (Usuku Lwenethiwekhi Lwethuba Lebhizinisi) ehlelwa abe South African Tourism. Le yinkundla ehlanganisa osomabhinisi abanentshisekelo yokucobelelana ngolwazi ngezingxoxo ezivuselelayo. Lapha osomabhizinisi ababamba iqhaza bekhuluma ngamasu okushintsha nokuthuthukisa umsebenzi kule mboni yezokuvakasha nokwakhana ukuze imboni yezokuvakasha e-Afrika ibe ngesimeme kakhulu.

UDarryl Erasmus oyi-COO eSouth African Tourism, uthi iBONDay ibalulekile kulabo abafuna ukucathuliswa ngale mboni bathole amasu amasha okuthuthukisa amabhizinisi abo.

“I-BONDay iyona ecacisa konke okuzokwenzeka kuleli sonto ngohlelo oluhlanganisa inkulumompendulwano ngamasu amasha okusebenza. Lena yindawo yokuxhuma, ukubambisana nokudala ikusasa eliqhakazile kwezokuvakasha ezwenikazi lethu," kusho yena.

Ongakulindela kulolu hlelo:

• Inika amandla kwababambiqhaza kwezokuvakasha ukwazi ukungena nokubamba iqhaza ekuncintisaneni emakethe yomhlaba 
• Ikhuthaza ukukhula kulo mkhakha okubandakanya wonke umuntu
• Ixhumanisa ama-SMME nosomabhizinisi emathubeni atholakalayo emhlabeni wonke 
• Igqugquzela intshisekelo yokubeka i i-Afrika ezingeni eliphezulu kanye nokuqamba izinto ezintsha