Uya eMhlathuze owokubhunga ngokutshala imali kwezokuvakasha

UMASIPALA waseMhlathuze usuthole ingqayizivele yethuba lokungenisa imali nokudoba iso labatshalimali ezindaweni ezakhele le ndawo, kulandela isimemezelo zokuthi yiwona ozosingatha iTourism Investment Forum Africa (TIFA), umbuthwano okuhloswe ngawo wukuzobhunga ngamasu okuphendla amathuba nokutshala imali kwezokuvakasha.

Izindaba ze-TIFA, ezobe ibuya ihlandla lesithathu nonyaka, zimenyezelwe yimeya yalo masipala uMnuz Xolani Ngwezi, ngoLwesine e-ICC, eThekwini, ngenkathi kusongwa umbuthwano omkhulu wokucobelana ngezamabhizinisi nezokuvakasha i-Africa's Travel Indaba.

Nonyaka lo mbuthwano uzoba seThembela Events Venue, eRichards Bay, enyakatho yeKwaZulu-Natal ngo-Agasti 26 no-27, kanti indikimba yakulokhu ithi Tourism and Infrastrcuture Investment: Driving Economic Transformation and Enhancing Community Well-Being, okusho ukuthi kuzoqhakanjiswa ezokuvakasha nokutshala imali kwezokwakha, bese kubekwa eqhulwini ukuguqula ezomnotho nenhlalakahle yomphakathi.

Okunye okuhle nokuzosiza uMhlathuze ngalo mcimbi wukuthi uzobe uhlanganise abatshalimali basemazweni ehukene omhlaba wonke jikelele, kanti futhi kulindeleke ukuthi kungene imali ngabo njengoba bezobe bethuthelana besuka ngqo esikhumulweni sezindiza esiseGoli, beza kwesiseRichards Bay, okuzosiza futhi ukuthi kungenise imali kwabezindawo zokulala ezikhona kuleli dolobha nezakhelene nalo.

Imeya uNgwezi ugcizelele ukuthi beyidolobha nomasipala bazozibophezele ukuqikelela ukuthi lo mbuthwano uba yimpumelelo ukuze ushiye umaka nomehluko obonakalayo ekuthuthukiseni umnotho wakhona nowesifundazwe sonkana.

"Sihlose ukukhulisa umnotho wethu sibe siqhubeka futhi nokwenza ukuthi idolobha lethu nesifunda sethu kube ngezihlonishwayo nezikwazi ukuncintisana nezinye ezinjalo, yingakho kumanje sesivele sinezinhlelo zokutshala imali ezizoba wusizo ukuthatha umbono wethu, zenze ube yimpumelelo yesikufisa ngemboni yezokuvakasha. Enye into esisiza kakhulu ukusibeka lana esikhona manje wukuthi indawo yethu yakheleke bude buduze nezinye izindawo ezithandwayo eziseZululand naseMaputaland, esibona kuzosiza kakhulu ukuzinothisa nazo ngaleli thuba," usho kanje.

Isikhulu esiphezulu sohlaka lwezokuvakasha nezamafilimu esifundazweni iKwaZulu-Natal Touris and Film Authority, uMnuz Sibusiso Gumbi uthe bayaweseka kakhulu lo mbuthwano, futhi bazobamba iqhaza lokuthi konke kuhambe kahle kuwona.

"Lokho sikwenza ngoba lolu hlelo luhambisana nombono wethu wokuthuthukisa isifundazwe sethu okuzokwenza sihlonishwe futhi sibe ngesicatshangwa kuqala uma kunezinhlelo zokuthuthukisa ezokuvakasha, ukuqopha nokukhiqiza amafilimu nemidlalo eyahlukene yethelevishini, esibona kuzoqala ukufezeka ngalo mbuthwano ozayo," kusho uGumbi.