ULwah nesiqalo esisha ethula i-albhamu yesibili
UMCULI we-Afro pop, uLwah Ndlunkulu, ukhiphe i-albhamu yesibili ethi Amaciko
Image: SITHUNYELWE
INTANDOKAZI yomculi we-Afro pop, uLwah Ndlunkulu, isidalule ukuthi i-albhamu yayo yesibili esihloko sithi Amaciko, ephume izolo, ihambisana nesiqalo esisha segxathu elihle nelikhulu esiqoke ukukwenza ngegama lobuciko bakhe kule ndima.
ULwah Ndlunkulu (25) usho njalo ekhuluma emcimbini abewenze ePlayhouse, eThekwini, ngoLwesibili, wokuzwisa abalandeli bakhe abawu-500 abebahlanganise kule ndawo mahhala ukuzobazwisa izingoma eziwu-12 azididiyele kule albhamu elama eyango-2023 ethi Imizwa.
"Ukuqamba le albhamu ngokuti Amaciko kungaphezu komculo nje kuphela kepha kuhambisana nesigaba sezinto ezinkulu esengiqoke ukuzenza empilweni yami njengoba sekukhona namanye amabhizinisi ami engiwaqambe ngalokho okukhona kuwona elokudla - Amaciko Foods nenkampani yami yezobuciko - Amaciko Production.
UMCULI we-Afro pop, uLwah Ndlunkulu, ukhiphe i-albhamu yesibili ethi Amaciko
Image: SITHUNYELWE
"Kanti futhi lona wumsebenzi engikhombisa nengichaza ngawo uthando nenhlonipho enginakho ngamaciko emikhakha eyahlukene akhona ezweni lethu, njengoba sonke sazi ukuthi abamba iqhaza elikhulu kangakanani emphakathini nasempilweni," usho kanje.
Kule ngoma uthe abantu abalindele uLwah Ndlunkulu abamaziyo njengoba eqhubekile waqinisa kwisigqi se-Afro pop aziwa ngaso, kanjalo nesinesigqi somaskandi njengoba kukhona ingoma ayishaye noThokozani Langa ethi Ithemba, akwenze ngamabomu ngenxa yothando akhule enalo ngomculo wesintu.
"Kukhona futhi ethi Ngizobonga, engeyokuqala kwi-albhamu, engiyishaye neciko lasePort Shepstone, uPoshani Mzansi, lapho engibonga khona uNkulunkulu ngakho konke okuhle angenzele khona empilweni ngoba ngikholelwa ekutheni konke kuwumusa wakhe futhi bekungeke kwenzeke ngokuhlakanipha nokwazi kwami kodwa," kusho uLwah Ndlunkulu.
Amanye amaciko asebenze nawo kule albhamu woMawhoo engomeni ethi Nembeza, uSaliwa kwethi Dlala Kamnandi, uDanya Devs weBlaq Diamond kwethi Alone noMusiholiq, aqopha naye kwiNkabi Records, engomeni ethi Izinyembezi.
ULwah Ndlunkulu udabuka eHluhluwe, enyakatho yeKwaZulu-Natal, igama lakhe lokuzalwa wuLwandlile Mtshali. Uqale ukugqama emculweni ngengoma kaBig Zulu ethi Umuzi eSandton, kanti futhi waziwa nangezingoma zakhe ezithi Ithuba, Ngiyeza, Eyami nezinye.