Ngempelasonto yesikhumbuzo sikaSenzo Meyiwa, abalandeli bakaKelly bathole ukuphoxeka
Umangaze abaningi uKelly Khumalo ehlehlisa umcimbi wakhe kungazelele muntu
Image: Sigciniwe
Ibe muncu impelasonto yabalandeli bomculi uKelly Khumalo ngokufanayo nabalandeli bebhola abebekhombula iqhawe labo uSenzo Meyiwa.
Kule mpelasonto bekuphela iminyaka engu-11 kwabulawa unozinti weBafana Bafana ne-Orlando Pirates uSenzo Meyiwa.
UMeyiwa wadutshulwa kubo kwentombi yakhe engumculi uKelly Khumalo eVosloorus ngomhla ka26 Okthoba 2014. Ukufa kwale nsizwa yaseMlaza kwashiya izinkulungwane zabathandi bebhola bedangela, basala nemibizo engaphenduleki njengoba namanje icala lokubulawa kwakhe lisaqulwa enkantolo enkulu yaseGoli. Bahlanu abammangalelwa abasenkantolo ngokufa kwalo mdlali.
Usizi nobuhlungu beminyaka akuyona into ebhekene nomndeni kaSenzo kuphela, kwazise nentombi yakhe, engumama wendodakazi yakhe uKelly usephile yonke leminyaka exhashwa ngezinhlamba, abalandeli bebhola abasola yena ngokufa kukakaputeni wabo obenekusasa eliqhakazile.
Kuqala impelasonto, abalandeli be-Orlando Pirates bebehlela indumezulu yomcimbi wesikhumbuzo kbo kaMeyiwa ngeSonto. Kulungiswa, izipho, izoso nezinsiza zokuhamba ukuze balubungaze ngendlela ekhethekile lolu suku nomama wakhe umufi.
Kubo kaKelly Khumalo eVosloorus lapho okwadutshulelwa khona uSenzo Meyiwa
Image: Itumeleng English/Independent Newspapers
Kwenzeka lokhu-nje ohlangothini likaKelly Khumalo kumuncu, abalandeli bathole umlayezo odidayo ovela kulesi sihlabani ongenayo nencazelo eqondile.
Uthini umlayezo?
Le ntokazi ikhiphe isitatimende imemezela ukuhlehla kwendumezulu yomcimbi wayo obubhekwe ngabomvu yizinkulungwane zabalandeli ezweni lonke.
Le ntokazi yakwaKhumalo edabuka eNquthu, kulo nyaka ibihlele ukubungaza ngendumezulu yomcimbi, iminyaka engu-20 isembonini yomculo.
Konke besekuhleliwe, usuku mhla ka-15 Novemba, indawo Meropa Outdoor Arena. Le ntokazi ayichazanga kabanzi ngembangela yokuhoxa kwalo mcimbi noma ikhiphe usuku olusha.
"Ngixolisa kakhulu, kodwa kumele kuthathwe izinqumo ezinzima ukuze lokhu kwenzeke ngendlela elungile