Bazobhema bakholwe enkonzweni yendumiso eMnambithi

ABAZALWANE bazobhema bakholwe kwi-Ukukhala KweCilongo Worship Experience eLadysmith Town Hall, eMnambithi, ngoNovemba 14. Inkonzo iyoqala kusukela ngo-5 ntambama njengoba kuzobe kushunyayelwa, kudunyiswa, kukhulekelwa zonke izingqinamba ezikhungethe umphakathi wakuleli.

Umgqugquzeli wale nkonzo uNoluthando "Thando Jobe" Sithole, uthe inhlosongqangi ukuhlanganisa abazalwane bamabandla ahlukahlukene. Uthe kuzobe kukhona izinceku zenkosi okubalwa kuzo  unkosikazi kaMfu Thulasizwe Buthelezi, uNomthandazo, umculi uSindi Msibi ovela kuTshwane Gospel Choir, umculi u-Ayanda Nene, umculi uSihle Khumalo nabanye abaningi. Intshumayelo eqavile nokungeyosuku izobe yethulwa wuMfu L Buthelezi (Shabadai).

UThando Jobe yintokazi ezelwe kabusha edabuka endaweni yaseWasbank. Uqale ukucula ngonyaka ka-2018, wakhipha izingoma ezimbili ezathandwa kakhulu. Eyokuqala ithi Useyizwile nethi Lomusa Ongaka.

Ngo-2022, washadela kwaNgcobo eMnambithi, okuyilapho esehlala khona ngokuphelele. UThando Jobe akagcini ngokucula, ubuye abe usomabhizinisi ophatha izinhlelo emicimbini emikhulu enjengeDundee July, imishado nasemabandleni.

Useke waba nenhlanhla yokushiyelana inkundla nabaculi bokholo abanjengoSgwili, uBabo Ngcobo, uNathi noNkanyiso kanye neGlory of The Last Days. Ngaphezu kwalokho, uthe ubuye ahlinzeke ngezinsimbi zokucula emicimbini yezinkampani naseminyangweni kahulumeni ehlukahlukene.

Esephetha, uthe kule nkonzo kuzobe kungenwa ngomnikelo ka-R100 nangoka-R250 futhi amathikithi aseyatholakala eShoprite Checkers naseComputicket.