Umnyombo ngokubuya kukaShalulile esikimini seSundowns
ABAGADLI beMamelodi Sundowns oPeter Shalulile no-Iqraam Rayners ababangiswa isikimu wuMiguel Cardoso ongumqeqeshi weqembu
Image: BACKPAGEPIX
UMQEQESHI weMamelodi Sundowns, uMiguel Cardoso, ubhodle ngokuthelelana kwakhe amanzi nomunye wabagadli abamqoka kuleli qembu laseChloorkop, uPeter Shalulile, okusale kancane ukuthi alishiye ngasekuqaleni kwesizini.
UShalulile nguyena ovule inkundla ngesikhathi iSundowns ibambana ngo 1-1 ne-Orlando Pirates ngempelasonto edlule, eLoftus Versfeld Stadium, ePitoli.
Kusukela uCardoso afika kwiSundowns, kunzima ukuziba ubuncane besikhathi esitholwe yilo mgadli obahlula bonke kwiPremier Soccer League (PSL) ngokuhlohlwa kwamagoli kuyona yonke imiqhudelwano kusukela yasungulwa ngo-2016.
Ngaphambi kokufika kukaCardoso kwiSundowns, uShalulile ubengomunye wabadlali abizwa kuqala amagama abo esikimni.
Kuqapheleke kalula-ke ukupheshukelwa kwakhe yisikimu kwazise uCardoso ubemshiya ngaphandle emidlalweni emqoka yeCaf Champions League.
KwiFifa Club World Cup ebise-United States of America (USA), uCardoso ubengambheki nangeso. Emuva lwalokho, kuqubuke izinkulumo zokuthi uShalulile usethungatha elinye ikhaya.
Ngokuthola kweSolezwe, kunesikhathi lapho uShalulile enikwe khona yiSundowns ithuba lokuxoxa nelinye lamaqembu aphambili eTunisia kodwa kwaphinde kwathula kulandela inkulumo yalo mdlali nomengameli uTlhopie Motsepe.
Ngesikhathi ekhuluma nabezindaba emuva koweligi nePirates, uCardoso uvumile ukuthi izinto zike zatsheka phakathi kwakhe noShalulile kodwa konke sekuqondile.
“Ngeke nginabe ngobekwenzeka kodwa imimoya ike yaba phezulu ekhempini ngenxa yezizathu nazo engingeke nginabe ngazo ngoba ezangaphakathi,” kusho uCardoso.
“Okusemqoka wukuthi imimoya isiphansi kithina sonke ekhempini yingakho namagoli eseqala ukubuya kuShalulile. Ungumgadli esithembele kuyena uShalulile kodwa uke waphazamiseka kungacaci noma uyahlala kithina noma uyahamba.
“Bekunzima ukumqalisa imidlalo ngasekuqaleni kwesizini ngoba uRayners ubeshaya amagoli kuyona yonke imidlalo. Nakhona lapho ubesamukele isimo, elinde isikhathi sakhe njengoba sekungelakhe ijezi kusukela kulimale uRayners eseqenjini lesizwe."
UShalulile osedlale imidlalo engu-12 kule sizini kuyona yonke imiqhudelwano, useshaye amagoli amane. Kulindeleke ukuthi asize iSundowns uma isibhekene neTS Galaxy emdlalweni wePremiership eLoftus Versfeld Stadium ePitoli, kusasa ngo-7.30 ebusuku.