UMngqithi uhlose ukuwuphinda ngeCarling umlando kwi-Arrows
UMQEQESHI weLamontville Golden Arrows, uManqoba Mngqithi, ofuna ukuphinda umlando wokudla isicoco engathishiwe
Image: BACKPAGEPIX
KUZOFANA nokuthi iLamontville Golden Arrows neMarumo Gallants bagida ndawonye njengoba bezobhekana emidlalweni emibili ezinsukwini eziyisithupha kwiBetway Premiership nakwiCarling Knockout ngokwahlukana eKing Zwelithini Stadium, eMlaza.
Ngesikhathi i-Arrows imatasa namalungiselelo okwamukela iGallants emdlalweni weligi kule mpelasonto, iphinde yaqhathwa nalo leli qembu kowandulela owamanqamu weCarling Knockout.
EzikaManqoba “TV” Mngqithi ezisazama ukubamba umgqigqo kwiligi njengoba zisendaweni yesishiyagalolunye kwi-log yePremiership, zinethuba lokukwenza lokhu ngeGallants emdlalweni ozokuba ngeSonto ngo-3.30 eMlaza.
La maqembu ayalingana ngemidlalo yeligi (10) kanti nangokwamaphuzu abambene (13) okwenza umdlalo wawo ubhekwe ngabomvu.
Emuva kokwebula iStellenbosch FC ngo 4-0 ngoLwesithathu ebusuku, eDr Molemela Stadium, kwi-quarterfinal, iGallants iqhathwe naBafana Bes’thende kowandulela owamanqamu weCarling ngo-9 Novemba enkundleni esazomenyezelwa yiPremier Soccer League (PSL). Makhulu amathuba okuthi udlalelwe eKing Zwelithini Stadium okuyinkundla eyikhaya le-Arrows.
Emuva komdlalo weligi ne-Arrows, iGallants izobhekana neDurban City ngoLwesithathu (6 Novemba) eChatsworth Stadium, eThekwini. Ngalolu usuku i-Arrows izobe ibhekene ne-Orlando Pirates eMlaza.
Nakuba i-Arrows inomlando omuhle uma ibhekene neGallants kusukela ngo-2021 kodwa inkulumo yakamuva kaMngqithi ikhombise ukuthi iCarling uyifuna eLamontville.
Lo mqeqeshi owawina i-MTN8 ngo-2009, ne-Arrows ngaphambi kokuthola amadlelo aluhlaza, ubona okuningi okufanayo nangalesi sikhathi edla isicoco ngabadlali abangaziwa kodwa abagcina sebeyizinkakha njengoSiyabonga “Nsimbi” Sangweni, Kagisho Dikgacoi noThanduyise Khuboni abagijima kwiNdebe yoMhlaba yango-2010.
“Ngisibhekile isicoco seCarling ngoba kuningi okufanayo nangalesi sikhathi ngiwina i-MTN8 ngo-2009,” kusho uMngqithi.
“Nangaleso sikhathi kwakuseqhulwini ukungingabaza kwabaningi kwazise ngangiwumqeqeshi ongenaso isipiliyoni futhi neqembu lami lalibunjwe ngabadlali abangaziwa.
“Kangikungabazi ukuthi umlando ungaziphinda nakulokhu. Konke kusezandleni zethu ngakho-ke kukithina ukuthi senzenjani ngakho.
“Sinendlela yethu yokwenza futhi siyakholelwa kuyona. Ukudla isicoco kulele kithina ngoba ukuthi sinaso yini isipiliyoni sokwenza lokho noma kasinaso akusho lutho,"