UCardoso udalule imfihlo ngo-Allende esikimini seDowns
INJINI yeMamelodi Sundowns eyidlala yonke imidlalo uMarcelo Allende
Image: BACKPAGEPIX
ISIPHIWO nenhlanhla engandile kubadlali bakanobhutshuzwayo umhlaba wonke yizona zizathu ezimbili ezenza ukuthi umqeqeshi weMamelodi Sundowns, uMiguel Cardoso, aqale ngoMarcelo Allende njalo uma ebophela isikimu ngisho ngabe yimuphi umqhudelwano.
ISundowns ibusiswe ngenqwaba yabadlali abayizinsika emazweni abo ngakho-ke umqeqeshi wayo uphoqelekile ukuzijwayeza ukushintsha isikimu ukuze bonke bahlale bekhuthazekile.
Yize kunjalo, kuyacaca ukuthi uCardoso akalokothi abeke ngaphandle u-Allende uma engalimele kusukela lo mqeqeshi wasePortugal ethathe umsebenzi ngoDisemba, nyakenye.
Ngesizini edlule, u-Allende umele iSundowns amahlandla angu-49 okuhlanganisa neFifa Club World Cup. Kule sizini lesi siphekepheke saseChile sesidlale engu-16 kuyona yonke imiqhudelwano.
Ukukhishwa kuka-Allende ngomzuzu ka-75 ngesikhathi iSundowns inqoba ngo 2-0 kwiRemo Stars yaseNigeria emdlalweni womlenze wesibili wesigaba sokugcina sokuzifaka kweyamaqoqo yeCaf Champions League, kudwebe isithombe sokuthi uCardoso usecabanga umdlalo olandelayo.
ISundowns izobuyela enkundleni ngendumezulu yomdlalo obhekwe ngabomvu ne-Orlando Pirates ngaphansi kweBetway Premiership ngoMgqibelo ngo-3.30 ntambama eLoftus Versfeld Stadium, ePitoli.
Kulo mdlalo kuzofanele azibambe ziqine u-Allende noTeboho Mokoena kwazise abadlali bePirates basesiwini abahlanganisa uMasindi Nemtajela, Sihle Nduli, Sipho Mbule noThalente Mbatha bakhombisa ukudlondlobala.
“Kunohlobo lwabadlali olwehlelwa yifomu uma lukhishwa kweminye imidlalo kodwa (ifomu) iya ngokuya ikhule uma beyekwa bangakhishwa,” kusho uCardoso esithangamini nabezindaba.
“Leso ngesinye sezizathu ezenza kube sengathi u-Allende udlala yonke imidlalo kodwa futhi unesiphiwo esifiswa cishe yibona bonke abadlali abakanobhutshuzwayo emhlabeni.
“U-Allende akalimali. Bakhona abadlali abanjalo noma bengajwayelekile kodwa ungomunye wabo. Lokhu kwenza kube sengathi udlala njalo ngoba uhlala ekhona.
“Okunye ngaye uyafana nenhliziyo yeSundowns ngenxa yakwenza uma esenkundleni. Kunzima ukushiya ngaphandle umdlali owaziyo ukuthi ngeke alimale, ngeke lehle izinga lakhe kodwa futhi uzolokhu edlondlobale njalo uma umgcina enkundleni."