OweSundowns usongela amaqembu asendleleni yabo kwiCaf
MIGUEL CARDOSO
Image: ITUMELENG ENGLISH
INHLOKO yabaqeqeshi kwiMamelodi Sundowns, uMiguel Cardoso, yethembise ukungalususi entanyeni unyawo kwiRemo Stars yaseNigeria emdlalweni womlenze wesibili weyokuhlungela eyamaqoqo yeCaf Champions League ngoLwesihlanu.
Kowomlenze wokuqala iSundowns ilobole iRemo engompetha beligi baseNigeria ngo 5-1 emdlalweni obungeSonto e-M.K.O. Abiola International Stadium, e-Abeokuta.
EzikaCardoso eziye ekhefini sezivele zihamba phambili ngo 2-0, zibhudluze iRemo ngamagoli ananyathiselwe enethini nguTashreeq Matthews, Peter Shalulile, Miguel Reisinho, Arthur Sales noKatlego Ntsabeleng.
Elokubika ekhaya leRemo lishaywe nguSamson Olasupo umdlalo usuyophela.
Emuva komdlalo, uCardoso utshele abezindaba ukuthi indlela abawine ngayo kayisho ukuthi sebezokwehlisa njengoba kuseza owomlenze wesibili.
“Sidlale ngendlela esingadlala ngayo kuyona yonke imidlalo yethu emqoka njengoba noweRemo ububalulekile uma uzokhumbula ukuthi bekungowokuqala wethu kulo mqhudelwano kule sizini,” kusho uCardoso.
“Ukushaya amagoli ayisihlanu ubhekene nompetha baseNigeria akuyona into elula. Okumnandi ngala magoli wukuthi aqhamuke ngenxa yemigoga ebesivele siyicuphele leli qembu kulandela ukulicubungula kahle ngaphambi kokubhekana nalo.
“ISundowns inomlando kwiChampions League ngakho-ke kubalulekile ukuthi lapho ifika khona ikukhombise lokho. Ukuwa kwethu esihibeni sokugcina kulo mqhudelwano ngesizini edlule kwenza sikulambele kakhulu ukulungisa iphutha.
“Ngeke siyithambisele iRemo kowomlenze wesibili ngenhloso yokuthumela umyalezo nakulaba esisazohlangana nabo kulo mqhudelwano.
“Wonke amaqembu azobhekana nathi kulo mqhudelwano kule sizini kufanele azibambe ziqine."
UCardoso ubonge waphinda watusa abadlali bakhe abebesaphazeke i-Afrika yonke ngokwahlukana ngenxa yemidlalo yamazwe emasontweni amabili adlule.
“Ngizishaya isifuba ngabadlali bami okuthe bangabuya emaqenjini abo esizwe babuyela ngokushesha endleleni yethu yokwenza neyokucabanga.
“Akuyona into elula le abayenzile kodwa kungezinye zezinkomba ngokuqina kokhakhayi kubadlali abasemabhukwini eSundowns,” kusho uCardoso sakuqhosha.