Onozinti bePSL embangweni oshubile wokunqaba namagoli
UNOZINTI weMamelodi Sundowns, uRonwen Williams
Image: BACKPAGEPIX
USHISA phansi umbango wonozinti wokunqaba namagoli kwiBetway Premiership ngenjoba bebane asebegweme ukulilanda enethini amahlandla amahlanu kusukela kuqale isizini.
Ngaphambi kwemidlalo yeligi yayizolo, uSipho Chaine we-Orlando Pirates, Ronwen Williams weMamelodi Sundowns, Brendon Petersen weKaizer Chiefs noDaren Keet osemabhukwini eDurban City, bebesakugweme amahlandla amahlanu ukulanda ibhola enethini njengoba isizini isibheke ekuqedeni imidlalo engu-10 iqalile.
Umbango oqhubeka buthule kulaba onozinti ufakazelwa yindlela amaqembu abasemabhukwini awo ayiqale kahle ngayo isizini njengoba wonke ekwi-Top 8.
UNOZINTI we-Orlando Pirates, uSipho Chaine
Image: AFP
Kusukela kuqale isizini, uWilliams noPetersen basangenelwe amagoli amahlanu emunye uma ungabalwa oweChiefs neSiwelele FC odlalwe izolo.
UChaine naye obenomdlalo nePolokwane City izolo ebusuku, benoKeet, basavumele ukungenelwa amagoli amane unozinti ngamunye.
Bobane laba onozinti kabawona amavukane kwazise imiklomelo yabavelele sebeyibhubhudle iminyaka ngokwahlukana kwabo kuleli nangaphandle kwaseNingizimu Afrika.
Uma ingabalwa imidlalo yayizolo, uChaine usegweme ukulanda ibhola enethini amahlandla amahlanu emidlalweni eyisikhombisa kanti uPetersen usekwenze lokhu kweyisishiyagalombili.
UWilliams noKeet banqabe ukungenelwa amagoli amahlandla amahlanu emidlalweni yeligi engu-10.
Okusobala wukuthi lo mbango usazoqhubeka kwazise uphakathi konozinti abahlale bebalwa nabaphambili okufakazelwa wukuthi kumanje umklomelo weBetway Premiership Goalkeeper of The Season usekhabetheni likaChaine.
UWilliams ohamba phambili eMzansi nase-Afrika ngokodumo, usewudle amahlandla amane okanozinti ovelele kwiligi enkulu yakuleli (2018/2019), (2019/2020), (2022/2023) nango-(2023/2024).
Lo kaputeni weBafana Bafana useke wadla owe-PSL Footballer of the Season (2023/2024), Africa Cup of Nations (Afcon) Best Goalkeeper (2023), African Goalkeeper of the Year (2024) neminye.
UKeet naye ukhona emlandweni wokugoduka nesicoco sikanozinti ovelele njengoba enza ngesizini ka-2017/2017, ngesikhathi esiza iBidvest Wits idla isicoco seligi.
UKeet useke waba ngunozinti wonyaka nakwiKV Kortrijk yaseBelgium, avimba kuyona kusuka ngo-2011 kuya ku-2016.