ULekgwathi ukhuza amatata ngokuhlulwa kwePirates e-DRC
UNOZINTI we-Orlando Pirates, uSipho Chaine, okumele aqinisekise ukuthi akangenelwa yigoli uma sebebhekene neSaint Eloi Lupopo emdlalweni womlenze wesibili wokuhlungela isigaba samaqoqo seCaf Champions League e-Orlando Stadium ngoMgqibelo
Image: Isithombe:BACKPAGEPIX
UKAPUTENI wakudala we-Orlando Pirates, uLucky Lekgwathi, akasiboni isidingo sokutatazeliswa wumphumela weCaf Champions League obuye naleli qembu e-Democratoic Republic of Congo (DRC) ngoba linawo amava nezikhali zokuwuguqula kowomlenze wesibili.
IPirates efulathele iNingizimu Afrika ingayazi induku emidlalweni ecela kwengu-10 ngokwahlukana kwemiqhudelwano, ibuyiselwe kwamhlaba yiSaint Eloi Lupopo yase-DRC eyinenebule ngo 3-0 kowomlenze wokuqala wemidlalo yokuhlungela eyamaqoqo yeChampions League.
Ukusinda komphumela kushiye abaningi bekholwa wukuthi iPirates isifike ekugcineni kulo mqhudelwano ephume kuwona kweyandulela eyamanqamu ngesizini edlule.
ULekgwathi akasiboni isidingo sokuxhamazela ngoba ngaphezu kokuthi basekhaya, iPirates igqishe ngenqwaba yabadlali bohlobo oluphambili abangayitakula kulolu bishi okubukeka sengathi ikulona.
“Ngiyakholelwa ekutheni iPirates isengawuguqula umphumela ebuye nawo e-DRC ngoba inabo abadlali bokwenza lokhu kanti ithuba lokulungisa leli phutha ilitholela ekhaya,” kusho uLekgwathi.
“IPirates ibunjwe ngabadlali beBafana Bafana namanye amaqemu esizwe, ngakho-ke uma kukhona iqembu elinamava okujika lo mphumela yiPirates."
ULekgwathi ukhombe umdlalo weBetway Premiership nePolokwane City e-Orlando Stadium, eSoweto, kusasa ngo-7.30 ebusuku njengethuba elikahle lokucija lapho kufanele kucijwe khona, kuzanywe konke okufanele kuzanywe ngempelasonto.
Emuva kowePolokwane, kuzodlula izinsuku ezimbili iPirates yamukele iLupopo kowomlenze wesibili ngoMgqibelo ngo-3 ntambama kule nkundla yaseSoweto.
“Ngaphandle kokubacindeza kodwa abadlali bayakwazi okufanele bakwenze. Umqeqeshi ngokunjalo uyakwazi okufanele akwenze ngoba abadlali unabo. NoJose (Riveiro) wakhishwa yiJwaneng Galaxy kunje kodwa wangalahlwa. Ebholeni kuyenzeka ukuthi kungabi wusuku lwakho njengoba kwenzekile e-DRC. Kuyayiphoqa iPirates ukuthi ingazithambisi emdlalweni womlenze wesibili ngoba iLupopo izoza ngomqondo wokuvala emuva.
“IPirates igqishe ngabadlali abakujwayele ukuba sezimeni ezifuze lezi. Indlela iPirates eyenze ngayo kusukela kuqale isizini ikhomba ukuthi kukhona okuhle akuhlanganisayo u-Ouaddou (Adbeslam).
“Kuyethusa ukuthi siguqe ngo 3-0 kodwa lokhu akwenzi silahle ithemba ngokuthi abafana bazokwazi ukuwuguqula lo mphumela besizwa yizinkulungwabe zamaBhakaniya ezizobe zigcwele enkundleni,” kusho uLekgwathi owayesenkundleni ngo-2013 iBucs igcina ukufika kowamanqamu womqhudelwano weCaf.