UMotsepe ukhalime uMcKenzie ngengozi yokweqa imigomo yeFifa
UMENGAMELI weCaf, uPatrice Motsepe
Image: BACKPAGEPIX
UMENGAMELI wenhlangano eyengamele ibhola e-Afrika, iConfederation of African Football (Caf), uPatrice Motsepe, uxwayise uNgqongqoshe wezeMidlalo ubuCiko namaSiko, uGayton McKenzie, ngokuqikelela ukuthi akaphumi kujantshi ngencwadi okuthiwa uyibhalele inhlangano eyengamele ibhola emhlabeni, iFifa.
UMcKenzie ubhalele umengameli wale nhlangano eyengamele ibhola lomhlaba, uGianni Infantino, exolisa ngesenzo seSafa sokudlalisa uTeboho Mokoena kungafanele emidlalweni yokuhlungela iNdebe yoMhlaba, wamazisa nokuthi nenhlangano eyengamele ibhola kuleli, iSouth African Football Association (Safa) uyibhalele ngenhloso yokuthola izimpendulo.
Kule ncwadi uMcKenzie uqinisekise ku-Infantino ukuthi lokhu akwenzayo akukona ukugxambukela kepha njengohulumeni baphoqwa wumthetho ukuthi bafune izimpendulo kwiSafa ngodaba lukaMokoena kwazise isizwe sibheke bona.
“Le ncwadi akuyona eyokugxambukela kumbe ukuphikisa umthetho weFifa okuyiyona enegunya lokungena kwezithinta ukuphathwa kwebhola kepha ngeyokuxolisa ngesenzo seSafa nokukwazisa ngenye incwadi esiyibhalele uDanny (Jordaan) lapho sicela khona incazelo ngaleli phutha,” ibhalwe kanje ingxenye yencwadi kaMcKenzie ayithumele kwiFifa.
Kuyaziwa ukuthi iFifa kayizwani nokugxambukela kukahulumeni ezindabeni zikasoseshini owengamele ibhola yingakho kunemvunge eMzansi ngobungozi balezi zincwadi zikaMcKenzie.
UMotsepe obekhuluma emcimbini weSouth African National Editor’s Forum (Sanef) ngoLwesihlanu, eHoughton Hotel, eGoli, uzwakale ekhalima uMcKenzie kwazise iFifa iyasiqinisa isandla uma ithola ukuthi uhulumeni ugxambukela ekuphathweni kwebhola lezwe.
“Wonke amazwe akuleli zwekazi (Afrika) ayaziqonda izivumelwano eziphakathi kwabo bonke ososeshini nalapho kungahamba kugcine khona uhulumeni,” kusho uMotsepe.
“Akuyona into efihliwe ukuthi iFifa kayizwani nokugxambukela kukahulumeni ezindabeni zososeshini ngakho-ke ngithemba ukuthi uNgqongqoshe wezeMidlalo waseNingizimu Afrika uyaqonda ukuthi kunemigomo okungafanele ayeqe,” kusho uMotsepe ejobelela ngokuthi uma kuba nenkinga, uvule izandla ngokusiza ukuqinisekisa ukuthi kayeqiwa imigomo ebekwe yiFifa.