Abhekwe kuNgcobo noBvuma amangwevu okuweza iChiefs
SEBEKULUNGELE ukudlalela iKaizer Chiefs u-Asavela Velebayi noLuke Baartman osekunesikhathi belindile
Image: BACKPAGEPIX
ABADLALI beKaizer Chiefs bamanje bazoluncela kuNkosingiphile Ngcobo, Reeve Frosler noBruce Bvuma ulwazi ngokufanele bakwenze ukuze bafake leli qembu esigabeni samaqoqo seCaf Confederation Cup kwazise yibona kuphela abasele esikwatini esafinyelela kowamanqamu weCaf Champions League kumasizini adlule.
IChiefs eyagcina ukubonakala emiqhudelwaneni yase-Afrika ngo-2021, isethubeni lokuzifaka kweyamaqoqo njengoba izobhekana neSimba FC yaseDemocratic Republic of Congo (DRC) emdlalweni womlenze wokuqala wesigaba sesibili sokuhlungela iConfederation Cup ngoMgqibelo ekuhambeni.
Amakhosi agcina ukudlala eDRC egadulisana ne-AS Vita ngo-2014 kwiChampions League, azobhekana neSimba eStade TP Mazembe, eLubumbashi. Umdlalo womleze wesibili uzoba ngo-Okthoba 26 eDobsonville Stadium, eSoweto.
Njengoba iChiefs ilungisela uhambo lwase-DRC, imemezele ukuthi iya kulo mdlalo ngokuzethemba kwazise uMfundo Vilakazi usebuyile kwiNdebe yoMhlaba yabaneminyaka engaphansi kwengu-20 ebiseChile, nokuthi u-Asavela Velebayi noLuke Baartman bazobe sebekulungele ukudlala kulandela ukukhululwa kwabo wumahluleli weSouth African Football Association (Safa).
Konke lokhu kuyizindaba ezinhle kwiChiefs kodwa iningi labadlali elisemabhukwini ayo alikaze lidlale emiqhudelwaneni yeCaf. Nokho, abaqeqeshi abasabanjisiwe okunguCedric Kaze noKhalil Ben Youssef sebeke bahlala ebhentshini emidlalweni yeCaf kwazise bebehamba nomqeqeshi uNasreddine Nabi esaqeqesha iYoung Africans SC yaseTunisia.
Abadlali esingabala kubona uThabo Cele, Inacio Miguel noMdu Shabalala kabayazi imiqhudelwano yase-Afrika okuyilapho isipiliyoni salaba badlali abathathu ababeneChiefs ngo-2021 sizodingeka khona.
UNgcobo, Frosler noBvuma yibona bobathathu abadlali ababekhona kwiChiefs eyashaywa yi-Al Ahly yase-Egypt ngo 3-0 kowamanqamu owawuseMorocco.
Le Chiefs yayifakwe yizandla zikaGavin Hunt kowamanqamu weChampions League kodwa waxoshwa sekuseduze nawo. Umsebenzi waqhubeka no-Arthur Zwane.
Namanje abalandeli beChiefs basakhala ngesenzo saleli qembu elasusa uZwane esihlalweni labuyisa uStuart Baxter kowamanqamu osekungumlando ukuthi wawinwa nguPitso “Jingles” Mosimane.