Imfihlo kaRonwen ngokubuyisele iBafana emgqeni

Mthokozisi Mncuseni|Published

UNOZINTI weBafana Bafana ongukaputeni wayo, uRonwen Williams, ejabulela ukungena kwiNdebe yoMhlaba kulandela ukunqoba kwiRwanda

Image: BACKPAGEPIX

UBUHLUNGU benhliziyo, uvalo nezinkulumo zabantu baseNingizimu Afrika ezilumelayo emuva komphumela womdlalo weBafana Bafana neZimbabwe, kuholele ekutheni leli qembu lesizwe linciphise amaphutha ngesikhathi libhubhudla iRwanda ekuqaleni kwesonto.

Ngaphandle kweNdebe yoMhlaba ka-2010, iBafana eyayidlala ngoba isingethe umqhudelwano, ukunqoba kwayo kwiRwanda nokuvunywa wumphumela weNigeria neBenin, bekuqinisekisa indawo yaleli qembu lesizwe kweka-2026 kusukela ngo-2002.

Kucishe kwangenzeka lokhu ngenxa yephutha leSafa eliholele ephucweni amaphuzu amathathu kweBafana ku-Group C. Emuva kwalokho, leli qembu lesizwe lilahle amaphuzu libheke neZimbabwe emdlalweni ophele zibambene ngo 0-0 ngeledlule eThekwini.

Kube sengathi sekuphelile ngeBafana ngesikhathi kuphela umdlalo kwazise bekudumele abadlali nabalandeli. Lokhu kulandelwe yimibiko yokunqoba kweBenin ebisesicongweni se-log ngaleso sikhathi. 

Emuva komdlalo neRwanda, unozinti weBafana ongukaputeni uRonwen Williams, uvulele isifuba abezindaba ngobunzima ababhekane nabo kulandela umphumela womdlalo neZimbabwe.

“Ngeke sikubalekele ukuthi singabaseNingizimu Afrika lapho khona wonke umuntu enelungelo lokubeka uvo lwakhe kodwa iqiniso wukuthi leyo nkululeko ibuye ihambisane nezinkinga,” kusho uWilliams.

“Izinkulumo ezilumelayo zabalandeli bezifika kithina. Kwenzeka lokhu nje, nathi siswele umgodi wokucasha ngoba siyaqonda ukuthi asenzanga kahle kwiZimbabwe.

“Ngibone kungcono ukuthi ngibize umhlangano wabadlali bodwa sizobhunga ngendlela ebesizozikhipha ngayo kulolu bishi esizifake thina kulona.

“Kusizile nokho ukuthi abadlali bebezizwa ngendlela efanayo nami okwenze kwalula ukuthi sivumelane ngokuthi sisheshe siwudlulile umphumela weZimbabwe, sibhekane ngqo neRwanda.

“Ngizishaya isifuba ngalaba badlali engibaholayo. Engikwaziyo wukuthi nakithina akukaziki ukuthi kukhulu kangakanani esiphumelele ukukwenzela iNingizimu Afrika ngaphansi kwesandla esinesinono sikaHugo (Broos)."

UWilliams kulindeleke ukuthi aphinde ahole iBafana emqhudelwaneni i-Africa Cup of Nations (Afcon) ezoba seMorocco, ngoDisemba.