Kuvume inhlanhla iBafana ingena kwiNdebe yoMhlaba
KUTHELE izithelo ukuzikhandla kwabadlali beBafana Bafana okubalwa kubona uKhuliso Mudau njengoba izibekisele indawo kwiNdebe yoMhlaba ngokwehlula iRwanda emdlalweni wokugcina wokuhlunga eMbombela Stadium, eNelspruit, izolo ebusuku
Image: Isithombe:BACKPAGEPIX
Bafana Bafana (2) 3
Rwanda (0) 0
KUVUME izidalwa zikanobhutshuzwayo waseNingizimu Afrika ngesikhathi iBafana Bafana ithola imiphumela ebiphupha ngayo emidlalweni yokugcina ka-Group C yokuhlungela iNdebe yoMhlaba izolo ebusuku, eMbombela Stadium eNelspruit, naseGodswill Akpabio Stadium, e-Uyo eNigeria.
IBafana izifake kwiNdebe yoMhlaba yangonyaka ozayo ngokunqoba kwiRwanda okusizwe wukuwina kweNigeria kwiBenin emdlalweni ogijinywe ngesikhathi esifanayo eNigeria.
Ngaphambi kokuthi bahlale phansi abalandeli, uThalente Mbatha uvule inkundla ngenguzuga yeshodi ngomzuzu wesihlanu, emshiye enkemile uFiacre Ntwari weKaizer Chiefs obevimbele iRwanda.
Leli goli kube sengathi liyiqalisa phansi iBafana, kwavela amathuba ka-Oswin Appollis noTeboho Mokoena eduze kodwa baphikwa yinhlanhla umdlalo ungakafiki nasemizuzwini engu-20 uqalile.
Bekusobala ukuthi u-Appollis nguyena isikhali seBafana yingakho kungazange kuthuse ukuthi kube nguyena oyibeka ebuhleni ngengcwenga yegoli lesibili.
Okuqapheleke ngaleli goli wumnyakazo ojulile ka-Evidence Makgopa ngesikhathi akhela u-Appollis leli goli alizwe ngendaba unozinti weRwanda ngomzuzu ka-26.
Isiwombe sokuqala sisongwe sekungene uMohau Nkota endaweni kaThapelo Morena ngenxa yokulimala. Sithe siyosongwa isiwombe sokuqala, uNkota ubesesemabhukwini kanondwena.
Kube yiBafana ebuya ngomfutho kwesesibili kwaze kwaba umzuzu ka-62, lapho u-Appollis bekufanele akhulule khona iBafana nakakhulu ngegoli lesithathu.
UMakgopa ukhulule bonke abaxhumene neNingizimu Afrika ngegoli alingqofele enethini ngomzuzu ka-72. Nalo leli goli liqhamuke ngo-Appollis oshaye ikhona, wayingqofela enethini lo mgadli weBafana oyisithandwa sikaBroos.
Konke okulandele lapho bese kuyimibhiyozo kwazise uSipho Mbule, Appollis nabanye bese bengalithinti kakhulu kwazise nezihlwele zabalandeli bese zitholile ukuthi kwenzekani e-Uyo.
Emuva kokuminca, kugcine kuhlalukile ukuthi iBafana izoba yingxenye yeNdebe yoMhlaba ezokuba ngonyaka ozayo eMexico, Canada nase-USA.