ISafa icishe yawucekela phansi umsebenzi ‘wekhehla’

I-SOUTH African Football Association (Safa) icishe yacekela phansi umsebenzi "kamkhulu" waseBelgium, uHugo Broos, oyohlale ekhunjulwa emlandweni webhola laseNingizimu Afrika ngokubuyisela iBafana Bafana ezinhliziyweni zabantu baseMzansi.

Ukunqoba kweBafana kwiRwanda eMbombela Stadium izolo ebusuku newini yeNigeria kwiBenin e-Uyo emidlalweni ka-Group C, kufake ezikaBroos kwiNdebe yoMhlaba yangonyaka ozayo ezoba seMexico, Canada nase-United States of America (USA).

UBroos wathatha iBafana kuMolefi Ntseki ngo-2021 abalandeli bayo bengasanaki ngisho kuthiwa iyadlala. Imbangela yalokhu wukuthi iBafana eyake yasatshwa ebholeni lase-Afrika yayisiphenduke inhlekisa ebholeni lezwekazi kwazise yayilokhu ihlehla nyova kusukela yawina i-Africa Cup of Nations (Afcon) ngo-1996.

Kusukela ngo-1996, iBafana yafika kowamanqamu we-Afcon yango-1998 kwalandela iNdebe yoMhlaba amahlandla amathathu (1998, 2002 nango-2010).

Kusuka lapho kwaba sengathi iBafana ithakathiwe, isiphenduke ukudla kwenduku ngisho emazweni angazelwa lutho ebholeni lomhlaba njenge-Ethiopia neMauritania.

Usizi luqhubeke kwaze kwaba uyafika uBroos owabeka umthetho, waphinda wakucacisa ukuthi akazimisele ukulalela ababezama ukumtshela ngeqembu lakhe okuyilokhu afika ulibumba ngabadllai abagijima kwiPremier Soccer League (PSL).

Enonyaka uBroos efikile kwiBafana, kwasala kancane ukuthi ayifake iBafana kwiNdebe yoMhlaba ka-2022.

Lokhu kwalandelwa yingcwenga yebhola kwi-Afcon yase-Ivory Coast lapho iBafana yabuya khona nendondo yethusi. Sikhuluma nje iBafana isivele izibekisele indawo kwi-Afcon ezoba seMorocco ngoDisemba.

Kweyokuhlungela iNdebe yoMhlaba yaseMexico, Canada nase-United States of America (USA), konke bekuhamba kahle kwaze kwaba wukuthi ubudedengu eSafa House kufaka iBafana ezinkingeni ku-Group C ebiqhwakele kuwona, kudlaliswa uTeboho Mokoena kungafanele. Iphutha eliholele ekutheni iBafana iphucwe amaphuzu amathathu, lenziwe yimenenja yeqembu, uVincent Tseka, owahluleka wukuqaphela ukuthi uMokoena unamakhadi aphuzi amabili, okusho ukuthi kwakungafanele adlale ngesikhathi ibhekene neLesotho ezinyangeni ezedlule. 

*Irekhodi likaHugo Broos kwiBafana

Imidlalo: 38

Amawini: 20

Ama-draw: 12

Induku: 6

Akayazi induku kwengu-22 edlule

Wafika iBafana ikleliswe yiFifa kunombolo 75 njengoba eseyibeke ku-55.

*IMIPHUMELA yeBafana Bafana kusukela kwaqala imidlalo ka-Group C ngo-2023 imi kanje:

18 November 2023

Bafana Bafana 2-1 Benin

21 November 2023

Rwanda 2-0 Bafana Bafana

7 June 2024

Nigeria 1-1 Bafana Bafana

11 June 2024

Bafana Bafana 3-1 Zimbabwe

21 March 2025

Bafana Bafana 2-0 Lesotho

25 March 2025

Benin 0-2 Bafana Bafana

5 September 2025

Lesotho 0-3 Bafana Bafana

9 September 2025

Bafana Bafana 1-1 Nigeria

10 October 2025

Zimbabwe 0-0 Bafana Bafana

14 October 2025

Bafana Bafana 3-0 Rwanda