Amajita nethuba lokwelula umlando kweyeNdebe yoMhlaba
UTHATO Sibiya noGomolemo Kekana bejabulela igoli Amajita awine ngalo kwi-USA kowokusonga iqoqo kwiNdebe yoMhlaba yeFifa eqhubeka eChile
Image: CAF ONLINE
UKUBA yingxenye yeqembu laseNingizimu Afrika labaneminyaka engaphansi kwengu-20 (Amajita) eliqophe umlando ngokuba ngelokuqala lakuleli elinqobe imidlalo emibili kwiNdebe yoMhlaba kumenza azizwe ehloniphekile uThato Sibiya ongesinye sezilomo zaleli qembu eliphekwa nguRaymond Mdaka.
Amajita agile izimanga emdlalweni wokugcina ka-Group E weNdebe yoMhlaba yabaneminyaka engaphansi kwengu-20 eqhubekayo eChile ngokuguqisa ngo 2-1 i-United States of America (USA) engelinye lathwelwe ngeqoma ukudla isicoco.
Le wini ye-USA ibilandela eka 5-0 yeNew Caledonia okufake Amajita emlandweni wokuba yiqembu lokuqala laseMzansi eliwine imidlalo emibili koweNdebe yoMhlaba yeFifa.
Bekungokokuqala futhi Amajita edlulela kwi-Last 16 kusukela ngo-2009, eqeqeshwa nguSerame Letsoka emqhudelwaneni owawuse-Egypt.
Leso sikimu esasibophele abadlali abaseqophelweni eliphezulu okubalwa kubona uKermit Erasmus, Thulani Serero no-Andile Jali, sashaywa yiGhana kwi-Last 16.
USibiya osemabhukwini eMamelodi Sundowns, ukhulume nethimba labezindaba leSouth African Football Association (Safa) emuva kokunqoba kwi-USA.
“Kusenza siziwe sihloniphekile ukukhethelwa ukuba simele iNingizimu Afrika okungeyona imfihlo ukuthi ibusisiwe ngakubadlali,” kusho uSibiya.
“Ukuba semlandweni kufana nebhonasi. Ebesikufuna wukudlulela esigabeni esilandelayo. Isifiso sethu esikhulu nokuyikhona okusiqhubayo wukwazi ukuthi ukwenza kahle kukhuthaza laba abasilandela ngemuva.
“Ukwazi ukuthi saba nesandla ekufakeni uthando kwabancane kunathi kufana nesibusiso esivela kuMdali."
Kwi-Last 16, Amajita azobhekana neColombia eqede eqhulwini ku-Group F emdlalweni ozoba kusasa ngo-9.30 ebusuku e-Estadio Fiscal, eChile.
Amajita adlule neNigeria neMorocco kwamele i-Afrika kulo mqhudelwano.