IBafana nenselelo yokugoba izinsephe ezaduma kwi-PSL
Former Kaizer Chiefs forward Khama Billiat of Zimbabwe has decided to come out of international retirement UMGADLI uKhama Billiat ubalwa nezinye izibabuli zaseZimbabwe ezifakwe esikwatini esizobhekana neBafana Bafana emdlalweni wokuhlungela iNdebe yoMhlaba eThekwini, ngo-Okthoba 10
Image: Isithombe:AFP
SIYACHICHIMA ngabadlali bamanje nabakudala bePremier Soccer League (PSL) isikwati seZimbabwe esimi phakathi kweBafana Bafana namaphuzu amathathu azoyisondeza neNdebe yoMhlaba yangonyaka ozayo eMexico, Canada nase-United States of America (USA).
IBafana inomdlalo onzima ka-Group C weyokuhlungela iNdebe yoMhlaba nomakhelwane iZimbabwe ngo-Okthoba 10, eMoses Mabhida Stadium, eThekwini.
Nakuba iZimbabwe ibambe ibhuleki kwi-log yaleli qoqo kwazise kayiyazi iwini kusukela kuqale imidlalo yokuhlunga kodwa isikwati ezohlunga kusona esizobhekana neBafana kasikhombisi ukuthi ayisadlaleli lutho.
Lo mdlalo ufika nje, iBafana isadidekile kulandela ukuhlawuliswa yiFifa ngokuyiphuca amaphuzu amathathu, ijike nomphumela womdlalo weLesotho ewuthole ngenxa yokudlalisa uTeboho Mokoena kungafanele.
Zijikile izinto esicongweni se-log ka-Group C njengoba sekuyiBenin eqhwakele yize ibambene neBafana ngamaphuzu angu-14 kodwa ingcono ngokwezibalo zamagoli.
IBafana kayinawo uphawini wokungawini kwiZimbabwe nakwiRwanda nayo abazodlala nayo ekhaya ezinsukwini ezizayo uma izimisele ngokuqhuba iphupho lokuya kweyoMhlaba.
Ngenxa yokuqonda ukuthi iZimbabwe ayisenalo ithuba lokuqeda ngisho endaweni yesibili, kuthusile ukubona isikwati esikhishwe uMichael Ness waseGermany opheka amaWarriors.
Okusobala ngalesi sikwati wukuthi iZimbabwe kayizimisele ukuthambisela iBafana okwenza ezikaHugo Broos ziphoqeleke ukubhukula ngokuphindiwe kulo mdlalo.
Phakathi kwezinsepe ezisesikwatini seZimbabwe singabala uKnowledge Musona, Teenage Hadebe, Marshall Munetsi noKhama Billiat abaduma kwiChiefs, Pirates neMamelodi Sundowns ngokwahlukana eminyakeni edlule.
Kwabasadlala kwiPSL, kukhona uDevine Lunga, Terrence Dvukamanja, Elvis Chipezeze, Washington Arubi noThando Ngwenya abadlalela iSundowns, Siwelele FC, Magesi FC, Marumo Gallants naMaZulu FC ngokwahlukana.
UMunetsi owadlala kwiPirates osekwiWolverhampton Wanderers yase-England noTawanda Chirewa, bafike noMarvelous Nakamba wodumo kwi-Aston Villa kodwa osekwiLuton Town.
Leli yithuba labathandi bebhola baseThekwini namaphethelo lokusiza uBroos osebuyise isithunzi nogazi kwiBafana, afeze iphupho lakhe lokusonga kwezokuqeqesha ngokuhola iqembu kwiNdebe yoMhlaba.