UXaba ethubeni lokugcizelela ubungqwele eGoli
UMSUBATHI uGlenrose Xaba osethubeni lokuyinqoba yonke imijaho yeSPAR Grad Prix yanonyaka
Image: SITHUNYELWE
U-GLENROSE Xaba uzobe ebheke ukuyinqoba yonke imijaho yeSPAR Women’s 10km Grand Prix yanonyaka uma esegijima umjaho wesihlanu kulolu chungechunge kusasa.
Lo mjaho, ongowokugcina weGrand Prix yanonyaka, uzoba seMarks Park, eGoli, kusasa ngo-8 ekuseni.
UXaba (30) usesithathile isicoco seGrand Prix yanonyaka ngokunqoba imijaho emine yokuqala yalolu chungechunge eKapa, eThekwini, eTshwane naseGqeberha.
Uhamba phambili ngamaphuzu angu-115, okusho ukuthi akekho ozokwazi ukumfica ngisho noma ngabe kwenzekani kusasa.
USelam Gebre wase-Ethiopia usendaweni yesibili ngamaphuzu angu-101, alandelwe nguKarabo Mailula wakuleli osendaweni yesithathu ngamaphuzu angu-88.
UXaba, owanqoba iziicoco zakhe zokuqala zeGrand Prix ngo-2018 nango-2024, ungowokuqala omnyama waseNingizimu Afrika onqobe lo mqhudelwano kathathu ngokuthatha isicoco sanonyaka.
Ungene ohlwini olukhethekile lwabasubathi okukhona kulona abakuleli, uRene Kalmer no-Irvette van Zyl, uTadu Nare wase-Ethiopia noHelalia Johannes waseNamibia, nabo abanqoba i-SPAR Grand Prix kathathu.
“Ngiyethemba ukuthi ukunqoba kwami iSPAR Grand Prix kathathu kuzobakhuthaza abasubathi abasebancane. Ngikholwa wukuthi bazobheka engikuzuzile babone ukuthi uma mina ngingakwenza lokhu nabo bangakwazi ukukwenza,” uphawule kanje uXaba.
Lo msubathi ogijimela iBoxer Running Club, uphethe amarekhodi abesifazane akuleli ka-10km ne-marathon.
NgoJulayi nyakenye uqophe irekhodi lika-10km eqeda umjaho we-ABSA Run Your City eThekwini ngo-31.12, kwathi ngo-Okthoba nyakenye wanqoba iCape Town Marathon ngo-2:22:22.