MHHLELI: Ngicela ukudlulisa indlela okusebenza ngayo isiteshi samaphoyisa e-Utrecht. Lesi siteshi siyavalwa ebusuku. Angazi noma zonke iziteshi zamaphoyisa sekwaba yiyona ndlela yokusebenza yini.
Ezinyangeni ezedlule bekudutshulwa imoto yemali, yabalekela kulesi siteshi. Yafica kukhiywe isango. Kwaphinda kwagwazwa omunye umuntu, wabalekela kulesi siteshi emanaphanapha yigazi, wafika kuvaliwe.
Ngisho emini amaphoyisa akule ndawo ahlulwa wukubheka idolobha elincane. Angazi noma wukushoda kwezimoto, noma kwawona ayashoda, noma asehlangene nazo izigebengu.
Ngicela umphathi wamaphoyisa abhekisise ukusebenza kwalesi siteshi.
Okhathazekile
EMADLANGENI