OSAZIWAYO besifazane bakuleli, uHlosiwe "DJ Hlo" Mthalane, uBusisiwe "CiCi" Thwala noNtando Duma ngabanye abayingxenye yamaciko amele iNingizimu Afrika kumaShinning Star Africa Awards. Lezi zintokazi zidlana imilala nezinye izihlabani zase-Afrika.
UDJ Hlo uthe uthukile ethola izindaba zokuthi ukhethwe kulo mqhudelwano obophele izingwazi zase-Afrika.
"Ngijabule kakhulu ngoba kuyasho ukuthi ikhono lami alisaziwa eNingizimu Afrika kuphela, kodwa selivunywa nakwamanye amazwe. Ngiyabanxenxa abantu bakuleli ukuba baqhubeke nokungivotela ukuze ngigcine ngiwuphumelele lo mklomelo," kusho uHlo owaqopha umlando kuleli ngokuba uDJ wokuqala wesifazane ukuhlukanisa unyaka kuKhozi FM ngo-2021.
Emuva kokuhlabana kulo mqhudelwano, uDJ Hlo (25) waseSeaview eThekwini, wabe eseqokwa emncintiswaneni waseZambia, iZakomo Africa Awards kwiBest DJ kodwa wangalibona elidlalayo.
Usebuya konandisa kuchungechunge lwamakhonsathi abeseNamibia. UCiCi waseMnambithi waduma kakhulu ngomucu osihloko sithi Runaway kanti uNtando waziwa ngokulingisa kwiRhythm City nakwiThe Queen.
*Ukuvotela lezi zintokazi ungangena ezinkundleni zokuxhumana (Facebook/Instagram) ezibhalwe ukuthi Shinning Star Africa Awards.
Ukuvotela iqoqo lokuqala kuyagcina ekupheleni kukaMeyi.