KUZOBE kufinywa ngendololwane emqhudelwaneni wengoma, obizwa ngeSiyaviva NoMC Pholobas, ezinkundleni zemidlalo zaKwaDulela, eMalangeni, eNdwedwe, ngeSonto kusukela ngo-10 ekuseni.
Amaqembu engoma azobe eliqhamukisa ezindaweni ezakhele iNdwedwe noMgungundlovu, abanga ingangamela yenkomo. Umgqugquzeli walo mcimbi, u-Andile "MC Pholobas" Ngcobo, uthe kulindeleke izinkumbi zamabutho, njengoba kuzobuye kuklonyeliswe nenduna efike namabutho amaningi avunule kahle. "Wonke umuntu wamukelekile ngoba kuzobe kungenwa mahhala.
Phakathi kosaziwayo asebeqinisekisile ukuthi bazobakhona ngumlingisi onguCaptain Nyawo kuZalo, uMr Vibe nabaculi bakamaskandi, uMfiliseni Magubane noGadla Nxumalo. Abanye kulindeleke ukuba lishone usuku langoMgqubelo sebeqinisekisile."
UMC Pholobas unxuse abanamapasi ukuba bawaphathe ngoba kunento abahlelele yona. Uthe kunemindeni eyishumi ezobuyela emakhaya iqiqinge izijumbane zokudla kwenyanga yonke. Phakathi kwezicukuthwane ezilindelekile kubalwa amakhosi akhele indawo yaseNdwedwe. Phakathi kwabaculi abazonandisa kulo mcimbi kubalwa AmaBullet, China Max, Thabani Nxumalo, Amavikelamkhonto, Amawele Amahle, Amahlebezi, Spender, Inkonyane LikaShayina, Nomfundo Ndebele, Intombi Yentandane, Ozungezwayo, Tlele, Mcindezeli nabanye abaningi.