OWUDUMO kwiReal Housewives of Durban, uMabusi Seme, uphumele obala wagonyuluka ngodaba lweMabusi Vibes.
UMabusi uthe washaqeka ukuzwa umlingisi woMkhokha uMbali Ngiba ekhuluma kabi ngaye eziqeshini zikaSeason 3 zalolu hlelo.
Uthe kwamphatha kabi kakhulu ukuthi wahlangana noMbali kanye kwenye yezindawo zokudlela.
"Umhlangano esaba nawo waba mnandi. Ngangihleli nabangani bami e-restaurant, kugcwele. Thina sasesizohamba kodwa sesilinde ukukhokha. Ngathi abeze bezohlala nathi ngoba sesizohamba. Ngambuza ukuthi kuhamba kanjani kuhlelo futhi ngamluleka ukuba angadikibali.
“Ngathi uma ehlangabezana nenkinga, anganqeni ukungithinta. Ngamnikeza inamba yami," kuso uSeme.
Uthe washaqeka esemuzwa ekhuluma kabi ngaye ngesikhathi uNonku Williams ebaqhathanisa.
UMbali ezwakala kulolu hlelo uNonku wathi umkhombisa iMabusi Vibes, okusho umuntu ongcolile, ohluphekayo futhi onobujondolo.
"Ngesikhathi ngibona lokho ngamangala ukuthi usecasulwe yini futhi yini esimcasula kangaka ngami ngoba asazani ngaleyondlela," esho.
UMabusi uthe kwakuyimicabango kaMbali hhayi ukuthi ngamazwi kaNonku. "Akakaze uNonku akukhiphe ngowakhe umlomo ukuthi ngingcolile, ngiyahlupheka, nginobujondolo."
Uthe vele uNonku wayengafuni babe ngabangani kodwa akawashongo lawomazwi.
"Sonke sivela emijondolo. Ukuthi nje siyakhetha ukuthi siyakuveza lokho noma qha. Asikhulelanga emadolobheni. Siyayazi impilo yasemalokishini lapho uvele ujikijelwe ngetshe ungenzanga lutho. Uvele ulwe nje esikhaleni," kuqhuba yena.
Uthe abantu abenza sengathi bakhulele edolobheni baphila impilo yamanga, akakaze azihluphe ngokuthinta uMbali ngenxa yokuthi wayephoxeke kakhulu.
Nakuba kunjalo kodwa uMabusi usefikelwe wumqondo wokusungula izikibha azibiza ngeMabusi Vibes.
"Ngiphendule ulamula ngawenza iLemonade. Nginezikibha ezahlukahlukene, ezinemibhalo nezithombe. Abazidingayo bengazithola emakhasiini ami akuFacebook naku-Instagram abhalwe ukuthi Mabusi Vibes," kusho uMabusi.
Uthe okunye okumjabulisile ukwazi ukuthi uSeason 1 noSeason 2 usakazwa e-America ngoba kunabantu baphesheya kwezilwandle bayamxhuma ku-Instagram nokuthi bamthanda kangakanani.