OBEYISOKA likaNonku Williams, wodumo lohlelo iThe Real Housewives of Durban, uDumisani "Rough Diamond" Ndlanzi, ugonyuluke okokuqala ngezinsolo zokuqola uNonku.
Ekhuluma bukhoma ekhasini lakhe le-Instagram, uDumisani uphike walala ngomhlane ukuthi waqola uNonku maqede wakhala amaphepha, wabuyela kubo eRichards Bay. Uthe akazi ngisho elimnyama isenti likaNonku kodwa nguye obemtakula ngemali futhi uvele ngekhanda ezikweletini ngenxa yokusiza uNonku.
"Ngokuhlala ngike ngihlale eRichards Bay, naseMhlanga. NgiseMhlanga-ke namhlanje lapho ngikhona. Ngihlangana nomunye umuntu lapha eMhlanga. 'Nangu uRD. Kuthiwa uyafuneka.' Sengiyabuza, 'Kwenzenjani? Ngifunwa ngubani?'. Kuthiwe 'wena uvulelwe icala. Uqole uNonku.' Ngimtshele ukuthi ayikho leyo nto mhlawumbe abanye abantu sebeyabhema."
UDumisani uthe alikho icala avulelwe lona futhi akakaze amqole uNonku. Eziphedulela ubeke kanje: "UNonku bengithandana naye. Akakaze wangiphoxa, nami angikaze ngamphoxe. Angikaze ngithathe ngisho elimnyama isenti lakhe. Naye uyakwazi lokho. Mina njengendoda bengimondla. Ngakho yonke lento ekhulunywa lapha ayikho."
Uthe nabasebenzi bakaNonku bayalazi iqiniso lokuthi bekuthi uma uNonku ehlangabezana nezinkinga zokuphuza ukukhokhelwa, athinte mina. "Uma enezinkinga, ama-site akhe evaliwe. Bekuyimi obeholela abasebenzi bakhe."
Ukhale ngabantu ebebefuna ukukhethela uNonku abantu obekufanele athandane nabo. "Bakubize ngamagama abathanda ngawo. Anginandaba nalokho."
Uthe akakaze uNonku wamkhuluma kabi kodwa uzama ukuchazela abantu abebefuna ukwazi ukuthi kwenzekani phakathi kwabo. Uthe uvele ngekhanda ezikweletini ngenxa yezimoto ayeziboleka enza umsebenzi wakhe. "Akakaze angiboleke imali. Yimi ebengifaka imali. Ngisho umsebenzi wakhe. Wayesizwa yimi. Izimoto beziqashwa yimi njengendoda. Ngisezikweketini nje zezimoto, ngenza imisebenzi yakhe, cisho ezifika kuR50 000. Ngizowukhokha. Ngeke ukhokhwe nguye."
Ukugqabuka kwegoda phakathi kukaDumisani noNonku kwaqala ngesikhathi kubonakala uNonku esesuse zonke izithombe zikaDumisani emakhasini asezinkundleni zokuxhumana, emuva kokuveza ividiyo eyayiveza uDumisani emcela umshado. Ngesikhathi imithombo yezindaba izama ukuthola isiqiniseko ngokuhlukana kwabo, uNonku wayevele angene ezintangeni.
Ngesikhathi esephekwa ngemibuzo nguMablerh kwiReal Housewives of Durban Re-Union, uNonku wabihlika wakhala, maqede wakuqinisekisa ukuthi sebehlukene noDumisani kodwa ngeke anabe kabanzi ngoba udaba lwabo selusezithebeni zenkantolo. UDumisani uvumile ukuthi wake waboshelwa icala lokudlwengula kodwa lagcina liphelile.