Sekuzobayinsini yodwa kwiSitha The Enemy njengoba kuzohlangana izinsizwa ezingamathe nolimu futhi ezaduma kakhulu ngelikaPopeye noSpinach kwiZone 14, uKere Nyawo noThulani Didi.
Izindaba zokujoyina kukaThulani lo mdlalo osakazwa phakathi nezinsuku ku-e.tv ngo-9.30 ebusuku, ziqinisekiswe yinkampani ephethe lomlingisi, iBecky Casting Agency kuleli sonto.
UBekezela “Becky” Dube uthe uSpinach uyolingisa indawo kaStivovo kwiSitha The Enemy ekubeni uzakwabo, uKere evele elingisa ekaBulelani Sokhulu.
Lezi zingwazi zabalingisi zihlale zilingisa ndawonye ngenxa yokuthi zinobudlelwano obude.
Zaqala kwiYizo Yizo lapho zazilingisa khona indawo kaMa-7 no-38. Zafike zazakhela kakhulu udumo sezidlala indawo kaPopayi noSpinach kwiZone 14. Kusukela lapho, zibe sezingasaqashwa ngokuhlukana.
KwiZone 14, okuwumdlalo ezithi webiwa kuzo ngumngani wazo, uThami Madondo, zazakhela olukhulu ugazi kangangoba zagcina sezingamanxusa eCarling Black Label emuva kukaRuud Gullit, owayeyisihlabani sebhola saseHolland.
Muva nje bezidlala indawo kaPolony noVetkoek kwiThe River.
Ngaphandle kokulingisa, uKere noThulani banesikhungo sezobuciko esesivumbulule ikhono labalingisi okubalwa kubo uBonginkosi "Zola7" Dlamini, uTerry Pheto wodumo kwiTsotsi neThe Bold and The Beautiful, uRonnie Nyakale onguCosmo kwiGenerations The Legacy, u-Ernest "Chester" Msibi weYizo Yizo 1, uZakhele Msibi obenguSunday Nkabinde kwiSibaya, uNokuthula Ledwaba nabanye.
UKere noThulani batshele iHappyDays Podcast ukuthi uZola 7 bamthola esanama-dreads ekhanda, ekhonze ukucula izingoma zokholo kodwa bamgundisa wona sebemtholele indawo yokuvala indawo kaRonnie kwiYizo Yizo 2 lapho ayenguPapa Action.
Yize lezi zinkakha sezisebenze kangaka ngaphansi kwenkampani yazo iPositive Arts Society kodwa azikaze zahlonishwa noma zathola uxhaso eminyangweni kahulumeni.
Zithi namanje zisaqhubeka nokuvumbulula ikhono, elinye lalo ebelikuShaka Ilembe futhi baqashe abantu abaneziqu ukuba baqeqeshe intsha. Bathi isikhungo sabo basixhase ngemali abayenza ngamatoho okulingisa.