Zizowushaya maduze eNdlunkulu kaZulu
UMNTWANA uBambindlovu neNdlovukazi uPrecious Vilakati akade eyomembesa waphinde wamlobola ngempelasonto eSwatini, nokuwumcimbi okade uhanjelwe omzala bakhe basebukhosini okukhona kubo uMntwana uSikhanyiso
Image: Instagram
NOKUBONGWA PHENYANE noSABELO NSELE
KULINDELEKE ukuthi ziwushaye kungekudala ezinyaneni uMntwana uBambindlovu ozalwa yiSilo uZwelithini noNdlunkulu wesithathu, uMantfombi uMaDlamini, abangasekho.
UMntwana uBambindlovu ngoMgqibelo, umbese walobola emndenini wakwaVilakati, eSwatini, nokuwumcimbi okade uhanjelwe abakwabo, ngaphandle kweSilo uMisuzulu, obengekho.
Ubeyombesa alobole uNdlunkulu uPrecious Vilakati osekuneminyaka baveza enkundleni i-Instagram, ukuthi basothandweni oluvutha amalangabi.
UMNTWANA uSikhanyiso ozalwa yiSilo saseSwatini noNdlunkulu uZola Mafu wasoNdini, akade bengezinye zezicukuthwane kulo mcimbi
Image: Instagram
NgoMgqibelo, uNdlunkulu uLaVilakati ufake isimemo salo mcimbi njengoba besekuwusuku lwawo, nobubanjelwe ekhaya kubo eLugocweni.
Kulo mcimbi odadewabo beSilo, abaNtwana uNtandoyesizwe, Nomkhosi noBukhosibemvelo babonakale kwenye yama-video ezinkundleni zokuxhumana bezibambele emcimbini wakwabo.
Babonakale befika behamba phambili bephethe izingubo zomembeso nokuthe ekuhambeni kwayo, kwabonakala kuyibona futhi behamba phambili ekugqokiseni uNdlunkulu imvunulo yakwaZulu ekhombisa ukuthi useganile.
UMntwana uBambindlovu ubonakale embesa uNdlunkulu uLaVilakati itshali ebeligcwele imali wase egiya eqephuza.
Lo mcimbi ubuhanjelwe ngisho abaqhamuka ebukhosini baseSwatini, njengoba indodakazi endala yeNkosi uSwati, uMntwana uSikhanyiso ubeyingxenye yabakade bekhona.
ONdlunkulu beSilo uMdlokombane uKaMchiza wasoSuthu noNdlunkulu uZola Mafu wasoNdini nabo bebeyingxenye yalo mcimbi.
Khonamanjalo: Bathembisene umshado phambi kwebandla i-Oasis eMlaza, umsakazi weGagasi FM, uKhaya Mthethwa nesinqandamathe sakhe okusanda kuvela ukuthi basothandweni oluvutha amalangabi, uSne Ndlovu.
Lo mcimbi ububanjelwe izolo, nala behlanganiswe ngokwenkonzo ubaba kaKhaya, okunguye ohola leli bandla.
Kuvela ukuthi laba baqale baba nomcimbi esontweni kwase kuba khona omunye la bebedlubhe ezimhlophe nobusendaweni eyimfihlo, nabajabule kanye nemindeni yabo nabangani abasondelene nabo.
UKhaya owayeshadelwe yintokazi yaseMpumalanga eyake yathatha isicoco sikaMiss SA, uNtando Kunene, kwenzeka lokhu nje nayo le ntokazi isanda kubopha ifindo likasofa silahlane ezinyangeni ezidlule.