KUSHODA umqeqeshi kwiKaizer Chiefs, yingakho sekuphele amasizini amahlanu yagcina ukunqoba isicoco.
Lokhu kushiwo uJabu “Shuffle” Mahlangu, owayedume ngelikaPule, oyinkakha edlalele iChiefs, Orlando Pirates neSuperSport United.
UMahlangu ulibeke ngembaba elokuthi umqeqeshi waleli qembu, u-Ernst “Mazinyo” Middendorp uyehluleka ukuqeqeshi Amakhosi.
Ngokusho kukaMahlangu, uMiddendorp unayo yonke inhlobo yabadlali kodwa uyehluleka ukubahlanganisa badlale ibhola elinenkosi phakathi.
Ngesizini edlule iChiefs ingene ehlazweni yehluleka ukungena kwiTop 8, yaphinde yashaywa yiTS Galaxy ngo 1-0 kowamanqamu kwiNedbank Cup. IGalaxy idlala kwiNational First Division (NFD) futhi inonyaka yasungulwa.
“Iyinkinga indaba yeChiefs ngoba babathengile abadlali, bayile emakethe. Lapha ngikhuluma ngoKhama Billiat, Siphelele Ntshangase, Dumisani Zuma nabanye. Ngokwami umqeqeshi uyehluleka ukuhlanganisa abafana. Kwamina ngingayiqeqesha iChiefs ngalaba badlali enabo. Angicabangi ukuthi abadlali abakwiChiefs bayehluleka ngendlela osekushiwo ngayo, angiboni kanjalo. Bashoda ngekhanda elizobahola,” usho kanje uMahlangu oseyinxusa leSuperSport United.
Eqhubeka echaza uMahlangu uveze inkinga akholwa ukuthi yenza Amakhosi aboze njengoba eseyinhlekisa nje.
“Uma ungumqeqeshi abadlali bengakuhloniphi, kunzima ukuthola imiphumela. Okunye engikubonile kubadlali abambalwa beChiefs, abakuqondi ukuthi ukudlalela leli qembu kusho ukuthini.
“Uma ubuka e-Europe emaqenjini amakhulu afana neManchester United enezinkinga njengamanje, babiza abadlali abadala abadlalele iqembu, abafana noPaul Scholes, Ryan Giggs bayokhuluma nabadlali ukuze babenze baqonde ukuthi badlalela iqembu elikhulu kangakanani.
“Ngeshwa lapha eNingizimu Afrika amaqembu awazisebenzisi izinkakha ukusiza nokugquqguzela abadlali,” kuchaza uMahlangu.
UMahlangu uthe namanje kusenzima kuyena ukuqonda ukuthi iChiefs imbuyise kanjani uMiddendorp ekubeni wayigila esaphethe ngehlandla lakhe lokuqala, phakathi kuka-2005 no-2007.
“Esengumqeqeshi ngo-2007, iChiefs ayizange idlale kwiTop 8, bamlandile futhi buka bakuphi, abazudlala kwiTop 8.
Ngiyazibuza ngiyaziphendula ukuthi umuntu ohlulekile okokuqala, bese uyamqasha futhi okwesibili yikuphi lokhu osuke usukubonile? Kodwake yisinqumo sabakwaMotaung ngoba ibona abaphethe iqembu,” kusho uMahlangu.