IMAMELODI Sundowns iyiqale ngonyawo oluhle imidlalo yesigaba sokugcina samaqoqo kwiCaf Champions League ngokushaya i-Al Hilal yaseSudan ngo 1-0 emdlalweni obuseLoftus Versfeld, eTshwane, izolo ntambama.
Igoli enqobe ngalo iSundowns emdlalweni livalelwe phakathi wuCassius “Cash No Deposit” Mailula ngomzuzu ka-25, esiwombeni sokuqala.
UMailula ovutha bhe selokhu kuqale isizini, uphinde wakhombisa ukuqhubeka nefomu yakhe enhle aziwa ngayo kwiDStv Premiership. Bese kuyigoli lakhe lesine leli kwiChampions League, kwazise wahlohla amathathu iSundowns inenebula ngo 8-1 iLa Pase yaseSeychelles ngo-Okthoba, esigabeni sokuqala samaqoqo.
ISundowns ifike emdlalweni ivele ithelwe ngezibonkolo njengoba iqhobozela kwasani okuphambi kwayo emdlalweni yeligi, ngaphansi weDStv Premiership, okuthe naphakathi nesonto yaphinde yazibekisela indawo emzuliswaneni weLast 16 weNedbank Cup, ishaya iRichards Bay ngo 3-2.
Empeleni iSundowns yiyo ebiphezulu ngomdlalo kusukela ngesiwombe sokuqala, futhi bekufanele lo mdlalo ngabe iwunqobe ngamagoli amaningi ukube iwasebenzise ngendlela amathuba ebiwathola phambi kwamapali.
Umgadli waleli qembu oyisethenjwa, uPeter Shalulile, uhluleke wancama ukuthola igoli kulo mdlalo emathubeni ambalwa abewathola okubhakuzisa inethi, kodwa engayiboni imbobo lapho ingakhona.
Ukunqoba kwe’Downs umdlalo futhi ingangenelwa yigoli idlalela ekhaya, kuyibeka ethubeni elingcono uma isiyobhekana ne-Al Hilal, ekuhambeni ngoMashi 17 emlenzeni wesibili.
Amanye amaqembu iSundowns eqhathwe nawo kwiGroup B, yiCoton Sport yaseCameroon, ne-Al Ahly yase-Egypt.
Izobhekana neCoton Sport ekuhambeni e-Omnisport Roumde Adijia, eGaroua, eCameroon, ngoLwesihlanu ngo-6 ntambama.
Amaqembu azoqeda ephezulu kusukela kwiGroup B kuya kwiGroup D kwiChampions League azodlulela kuma-quarterfinal omqhudelwano.
Imiphumela yeCaf Champions League:
Zamalek 0-1 Belouizdad ; Raja CA 5-0 Vipers; Petro de Luanda 0-0 JS Kabylle; ‘Sundowns 1-0 Al-Hilal
Imiphumela yeNedbank Cup:
CT Spurs 3-0 Baroka; Maritzburg Utd 0-2 Chiefs; Stellenbosh 3-0 Swallows; Black Cross 1-2 Venda FC