OBESEBENZA kwiMamelodi Sundowns, uSteve Komphela uzwakalise ukulidabukela leli qembu ngokuxinwa inqwaba yemidlalo maqede wadalula ukuthi lesi simo sizokhathaza abadlali bayo ngokuqhubeka kwesikhathi.
UKomphela oseqeqesha iMoroka Swallows, ukusho lokhu esithangamini nabezindaba seCarling Black Label Knockout ebesiseGoli.
Ngesikhathi esho la magama, iSundowns beyingakawashiswa iTS Galaxy ijezi kulo mqhudelwano.
UKomphela usebenze iminyaka kwiSundowns adle nayo inqwaba yezicoco.
Uyishiye ekupheleni kwesizini edlule njengoba esekwiSwallows.
Njengoba amaBrazilians esevele ehlulekile ukunqoba iMTN8 aphinde aphuma kwiCarling, asesalelwe i-African Football League, Caf Champions League, Nedbank Cup neyeDStv Premiership.
UKomphela uzwelane neqembu lakhe elidala ngalokhu kucinana kwemiqhudelwano.
"Kuzoba u-African Football League, Champions League, DStv Premiership neyeminye imikhumulajezi. Ngakolunye uhlangothi kukhona nobunzima bokuhambela le midlalo yase-Afrika. Kuhanjwa inqwaba yamazwe ngaphambi kokufika kozodlala kulo,“ kusho uKomphela.
“Sikhuluma nje, iSundowns beyinabadlali abebekwiBafana Bafana ebibhekene neCote d'Ivoire. Umbuzo uthi ngabe bazobe sebekulungele yini ukudlala kolandelayo. Yebo iSundowns inabadlali abaningi, kepha ukushintsha oyedwa noma ababili kuba nomthelela endleleni yokudlala. Konke lokhu kuzokwenza abadlali bakhathale ngisho nasemqondweni. Lokhu kunika noma iliphi iqembu ithuba lokwenza kahle. Kumele kube iqembu elizimisele ngokunqoba kumnyama kubomvu. Yebo ingacinana imidlalo yeSundowns kodwa iyakwazi ukuzihlela.”
KwiCarling, lo mqeqeshi uzobhekana neRichards Bay, ngeSonto, ngo-3 ntambama, eKing Zwelithini Stadium.
Umdlalo owodwa osanqotshwe iNatal Rich Boys, ishaye zona iZinyoni maphakathi nenyanga edlule.
KwiMTN8 ezikaKomphela ziphume zisuka. Nokho kuhamba kahle kwiligi njengoba sezinqobe emine kweyisishiyagalombili. Zilele kweyesine kwi-log.
UKomphela uthe kuzoba umdlalo onzima ngeSonto.
"Nakuba ibhola kuwumdlalo wokubambisana kodwa kulukhuni ukuziba amagama abadlali abangase bakwenzakalise. Emasontweni edlule iBay isithwese obukhulu ubunzima. Umdlali wayo uNtsundwana (Somila) ubeyiphela endlebeni. Unamandla axakile, ukuba qatha kwakhe ngokomzimba kuthwesa izitobha umthwalo onzima. IBay inabadlali abanethalente nabalwayo. Angingabazi ukuthi umgadli wayo, uFiguareido (Justice) uthandazela ukuthi kuphindeke okwaseDobsonville. Nakuba kunjalo sizolwa nathi, sithole isikhathi esanele sokuyilungiselela iBay.“
EzikaKaitano Tembo ziya eKing Zwelithini sekuphele emithathu yeligi zihluleka ukunqoba. Kwezigcine ukuwudlala zihlulwe iPolokwane City.