TS Galaxy (2) 2
Mamelodi Sundowns (0) 2
IGalaxy iwine ngo 5-4 kumaphenathi
KUGQAME izikhala zezethenjwa kuMamelodi Sundowns iwashiswa ijezi zibekwa yiTS Galaxy emqhudelwaneni iCarling Black Label Knockout eMbombela Stadium, eMpumalanga, ngoLwesithathu ebusuku.
Amagoli eGalaxy ashaywe nguSphiwe Mahlangu noMlungisi Mbunjana esiwombeni sokuqala. AweSundowns ashaywe nguMarcelo Allende noGaston Sirino kwesesibili.
ISundowns ingene enkundleni ibheke ukubuyisa umgqigqo kulandela ukwehlulwa yi-Orlando Pirates kowamanqamu weMTN8 eThekwini, emasontweni amabili adlule. Idlale ngaphandle kwezethenjwa ebeziseqenjini lesizwe, iBafana Bafana, okukhona kuzona unozinti uRonwen Williams, Themba Zwane, Khuliso Mudau, Grant Kekana, Mothobi Mvala. UTeboho Mokoena ubengeke adlale ngenxa yesigwebo samakhadi.
Abanye abebengabonwa nguPeter Shalulile noLucas Ribeiro abajwayele ukuyishayela amagoli. Ingcindezi ihlale kubadlali abangalijwayele ijezi kusukekela kunozinti uReyaard Pieterse, Rushine De Reuck, Siphelele Mkhulise nabanye.
Ukwehluleka kwabo kushabalalise iphupho leSundowns lokuba iyiqembu lokuqala elizowina umqhudelwano omusha.
Nakuba iSundowns ihlala izishaya isifuba ngokuba nabadlali abaningi abasezingeni eliphezulu kodwa kuhlale obala ukuthi sisodwa isikimu esikwazi ukuyenzela umsebenzi enkundleni.
Emdlalweni, iGalaxy ikhombise zibekwa ukuthi izohlala emuva ilinde iSundowns. Nokho ukuhluleka kweSundowns ukuhlanganisa amaphasi kuyenzele umsebenzi waba lula. IGalaxy ifike okokuqala ezintini zeSundowns ngomzuzu ka-13, yalibeka phakathi, uMahlangu eqobela phakathi ibhola likaHigor Vidal aligobe eqhamuka kwesokunxele.
Ngomzuzu ka-16, uMbunjana ungqofele phakathi ikhona kaVidal. Leli goli lesibili liyivuse emaqandeni iSundowns kodwa kade ihluleka uma isifike phambili.
Esiwombeni sesibili, iSundowns iqhubekile nokuhlasela kodwa bebungapheli ubungozi beGalaxy uma ithola ibhola. Unozinti kweGalaxy, uFiacre Ntwari, utakule ezakhe evimba ibhola lika Junior Mendieta. Ngomzuzu ka-57, u-Allende udonse ishodi engaphandle kwebhokisi, lamudla uNtwari.
Ngesikhathi kusabhiyozelwa leli goli, kubemuncu enkundleni uBongani Zungu edlalisa kabi uBernard Parker okubukeke sengathi umephule umlenze. UZungu uthole ikhadi elibomvu. Ngomzuzu ka-97, uSirino obesuka ebhentshini ushayele iSundowns igoli lokulinganisa elenze kuyiwe esikhathini esengeziwe, kwadlulelwa kumephenathi.