BAVEZE ukukhathazeka abalandeli be-Orlando Pirates leli qembu liqinisekisa izindaba ezithathwa “njengezingakholakali” kubalandeli zokudayiswa kwesihlabani seqembu uThembinkosi “Nyoso” Lorch kwiMamelodi Sundowns.
Bekuqale ngamahlebezi ngezikhathi zasekuseni ngoLwesihlanu ukuthi uLorch angase avumbuke kwiSundowns, kodwa kwathi ebusuku iPirates yabe isikhipha isitatimende esiqinisekisa ngokusemthethweni ukuthi lo mdlali usejoyine iSundowns.
“UThembinkosi Lorch uzoshiya i-Orlando Pirates Club ngemuva kwezingxoxo uDkt Irvin Khoza nobuholi beMamelodi Sundowns.
Iqembu libonga u“Nyoso” ngeqhaza lakhe elikhulu ngokuvula elinye ikhasi emlandweni weqemubu,“ sifundeka kanje isitatimende sePirates sangoLwesihlanu ebusuku.
“Sifisela yena nomndeni wakhe okuhle kodwa enjongweni yakhe yezemidlalo yesikhathi esizayo.”
Abalandeli beZimnyama babe sebephendula ezinkundleni zokuxhumana, beveza ukukhathazeka nobuhlungu babo ngalezi zindaba. Kanti kwabamaSandawane bekuqhilika izihlathi ngokusayina kwaleli qembu lesi sihlabani, yize kukhona nabanye abebeshaya amakhala bethi usephelelwe wushatini lo mdlali.
UMkhonto Wesizwe Ndlovu, ongumlandeli wePirates, uthe: “Nxaaa! Nomjolo awukaze usihlukumeze kanje bafowethu, akuvumi nokuthi ngidle,” kusho uNdlovu ekhasini leFacebook yeSolezwe.
uJoe Mdletshe, naye ongumlandeli weZimnyama, uphendule wathi: “Hhawu Gatsheni ungayisho kanjani leyonto. Sathi silinde ukuhlukanisa unyaka ngeParis kwavele kwathi qham thushu umjolo. Cha kubuhlungu kona kodwa-ke impilo kumele iqhubeke, siyawadinga amadlelo aluhlaza empilweni.”
UHlengiwe Msomi, ongumlandeli weSundowns, uthe: “Lorch udlala kamnandi, sithi Lorch, Lorch, Lorch (esho ingoma). Kabo Yellow. Wamukelekile mfana ekhaya lezinkunzi.”
IPirates imemezela ukusayina kukaLorch kumaSandawane nje, akukapholi maseko leli qembu limemezele ngokusayina kwalo abadlali ababili, uThabiso Lebitso noThalente Mbatha.
ULebitso osuka kwiChippa United usayine ngokugcwele kwiPirates, kanti uMbatha osuka kwiSupersport United yena ubolekiswe kwiBucs izinyanga eziyisithupha, nombandela wokuthi leli qembu laseSoweto lingamsayina ngokugcwele ekupheleni kwesizini.
Ukujoyina kukaLorch iSundowns kusho ukuphela komshado wamasizini ayisishiyagalombili neBucs ayjoyina ngokugcwele esuka kwiChippa United ayebolekiswe kuyo yileli qembu, kusukela alijoyina ngesizini ka-2014/2015 esuka kwiMaluti FET College yaseQwaqwa, eFree State, eyayidlala kwiMotsepe Foundation Championship.