PHEZU kokuba umqeqeshi weKaizer Chiefs, u-Arthur Zwane, esekwa ngabaphathi baleli qembu kodwa kubukeka umphumela womdlalo wanamuhla weNedbank Cup nezimbangi i-Orlando Pirates, ungase unike umkhombandlela ngekusasa lalo mqeqeshi.
IChiefs izotholana phezulu nePirates emdlalweni obhekwe ngamehlo abomvu womkhaya baseSoweto, wowandulela owamanqamu weNedbank Cup, eFNB Stadium, eSoweto, namuhla ngo-3 ntambama.
IChiefs iya kulo mdlalo nje, kubhekwe ngabomvu ukuthi izokwazi yini ukuvuka izithathe uma isibhekene nePirates, kulandela ukubhaxabulwa kwayo yiSwallows FC ngo-2-1 emdlalweni weligi obungoMsombuluko.
Empeleni abanye abalandeli baleli qembu sebeke bakuveza kaningana kule sizini ukushaya kwabo amakhala ngomqeqeshi wabo, uZwane, bekhala ngokuthi akakakulungeli ngokwanele ukuhola leli qembu elilambele izicoco.
Ukuvulela isibhaxu kwaMakhosi kweZimnyama emdlalweni wanamuhla, okungalandelwa wukufinyelela kowamanqamu weNedbank Cup, bese kuba wukuphakamisa lesi sicoco, kubukeka kuyikhona okungase kuthobe izinhliziyo zabalandeli baleli qembu, kumcubuzele amagabade nakakhudlwana kubaphathi beqembu.
Ephawula ngalo mdlalo uthe: '’Imidlalo enjengalena inzima futhi kunzima ukuyiqagela. IPirates yenza kahle kulezi zinsuku, okwenza singabi yizimfivilithi.
“Kodwa sizokwenza ngakho konke okusemandleni ukuwunqoba lo mdlalo. Ukuhlulwa emdlalweni owandulela owomkhaya, akusho lutho. Izinto ziyehluka uma sekuwusuku lomdlalo, konke kuncika ekutheni yini esiyisa kubona nokuthi yini iPirates ezoyiletha kithina ngalolu suku?” kusho uZwane.
Empeleni ifomu kulezi zingqungqulu zaseSoweto ngaphambi komdlalo wazo womkhaya, ivame ukuphonswa ngewindi, kwazise nenye yalezi zingqungqulu ngisho kuthiwa beyiye kulo mdlalo ixhugela kodwa ivuka indlobane uma sezidudulana kowomkhaya.
UBobby Motaung oyimenenja yaMakhosi, wakubeka kwacaca ekhuluma nabezindaba emasontweni amabili edlule ngemuva komdlalo wama-quarterfinal eNedbank Cup neRoyal AM, eChatsworth Stadium, eThekwini, ukuthi noma uZwane angangasinqoba isicoco seNedbank Cup kodwa akayi ndawo.
Ngakho-ke lokhu kuyinkomba yokuthi ukudla kusengashintsha epuletini, njengoba kuyiqiniso elaziwayo ukuthi izinto zishintsha ngokushesha ebholeni, kwale ngisho izikhulu bezithembise okunye.
Abaphathi besangashintsha umqondo ngoZwane uma engahluleka ukunqoba iNedbank Cup, njengoba esevele ehlulekile nokulibekisela indawo kwiCaf Champions League.