Lamontville Golden Arrows (0) 0
Richards Bay FC (0) 1
IRichards Bay inqobe okwesibili kwiBetway Premiership kule sizini iguqisa iLamontville Golden Arrows ngo 1-0 emdlalweni obuseMpumalanga Stadium, eHammarsdale, ngoMgqibelo ntambama.
Igoli eliqinisekise amaphuzu agcwele eNatal Rich Boyz, lishaywe nguLindokuhle Zikhali esiwombeni sesibili esuka ebhentshini.
I-Arrows ibihlose ukuqhubeka nomgqigqo wokunqoba kwazise ibibuye namaphuzu amathathu kwemibili yakamuva yeligi, inqoba iRoyal AM neCape Town City.
INatal Rich Boyz ibinenselelo yokunqamula irekhodi elibi lokushaywa imidlalo yeligi emihlanu ilandelana.
Isiwombe sokuqala besingenayo iminyakazo eminingi ebikhombisa ukuthi kuhlangene abakhaya.
Ithuba elingcono litholwe yiBay ngomzuzu ka-32 kodwa ibhola likaYanela Mbuthuma ebelingagcwele lakhishwa nguKeenan Phillips lingakaweqi umugqa.
Likhuphukile izinga lomdlalo esiwombeni sesibili njengoba womabili amaqembu ebeseqala ukufika phambili.
Kwale kancane ukuthi uRyan Moon alibeke phambili ngekhanda iqembu lasekhaya ngomzuzu ka-53 kodwa ibhola lakhe lashaya ipali.
Kudlule imizuzu emithathu neBay yazama ukugadla. Ishodi likaThabiso Kutumela livinjwe ngunozinti u-Edward Maova, wathi uyaliqedela uThulani Gumede kwaphinde kwavimba uPhillips emugqeni.
Kulamule ipali ngomzuzu ka-67 ngesikhathi umdlali wasesiswini we-Arrows obesanda kungena, uBlessing Mchunu, ezama ukulibeka phakathi ngonyawo.
Ngomzuzu ka-73, uGumede umoshe ithuba lokubeka iBay phambili eshaya into ebheke eceleni eseqondene nonozinti. Nokho, kudlule imizuzu emithathu yagcina ilitholile igoli ngebhola elihle elishaywe nguZikhali esebhokisini ngakwesokunxele.
Lo mphumela ususe iBay emsileni, wayibeka endaweni ka-15 ngamaphuzu ayisishiyagalombili emidlalweni engu-11. I-Arrows isasendaweni yesithupha ngamaphuzu angu-13 emidlalweni eyisishiyagalolunye.