Kuzovuka amagqubu koweSharks neLions kwi-URC
UMDLALI weLions, uBathobele Hlekani, ozobhekana neqembu lakhe lakudala, iHollywoodbets Sharks, neqhawe lakhe uSiya Kolisi emdlalweni we-United Rugby Championship ngoMgqibelo.
Image: BACKPAGEPIX
I-HOLLYWOODBETS Sharks izobe ibheke ukuziphindiselela kwiLions uma la maqembu esebhekene emdlalweni we-United Rugby Championship e-Ellis Park, eGoli, ngoMgqibelo ngo-2 ntambama.
ILions iphuce iqatha emlonyeni iSharks kowe-URC obuseThekwini ekuqaleni kukaJanuwari, iyinqoba ngo 23-22 ngokushaya i-try ngomzuzu wokugcina.
Kusukela lapho, iqembu likaJP Pietersen likwazile ukubuyisa ithemba lokudlulela esigabeni somkhumulajezi ngokunqoba imidlalo emibili emqoka, liguqisa iDHL Stormers eKapa naseThekwini.
Le miphumela ibeke iSharks endaweni yesishiyagalolunye ngamaphuzu angu-24 emidlalweni engu-10. ILions isendaweni ka-10 ngamaphuzu alinganayo.
Njengoba amaqembu ayisishiyagalombili azoqeda phezulu ekupheleni kwesigaba samaqoqo ezodlulela kuma-quarterfinal, lo mdlalo umqoka kuwona womabili la maqembu.
Umdlali waphambili weSharks, uVincent Koch, uthe bayayazi inselelo abazobhekana nayo ngoMgqibelo, ikakhulukazi bona okufanele badudule kuma-scrum.
“Kuzoba nempi enkulu phambili. Sigxile kulokhu okufanele sikwenze futhi kufanele sithuthuke kuma-scrum. Yilokho ebesigxile kukhona kakhulu ezinsukwini ezimbalwa ezedlule,” kusho uKoch.
“ILions inabadlali abanamandla phambili. Bayabambisana bonke kuma-scrum, abathembeli kubadlali abambalwa. Sike sadedela amathenathi angenasidingo emidlalweni edlule. Sihlose ukuthi sikhonye umdlalo uqala uze uyophela.”
Umdlali osemncane weLions ogijima kwi-looseforward, uBathobele Hlekani, obesemabhukwini eSharks ngonyaka odlule, uthe ukubheke ngabomvu ukududulana noSiya Kolisi, ongelinye lamaqhawe akhe.
“Ukubhekana noSiya kuzoba yinto ekhethekile, angikwazi nokuyichaza. Bengibukela kuyena kusukela ngisemncane. Siphuma elokishini elilodwa eZwide, e-Eastern Cape,” kusho uHlekani.
“Kusho lukhulu kimina ukuthi sengizokwazi ukubhekana naye emdlalweni osemthethweni. Ungumuntu engangilokhu ngifisa ukudlala naye eqenjini elilodwa nokubhekana naye. Lo mdlalo ubalulekile kimina.”
Lo mdlalo uzophinde wenze umehluko omkhulu kwi-log ye-South Africa URC Shield, okuyi-log ekhethekile lapho kubhekwa khona imidlalo phakathi kwamaqembu akuleli kuphela.
ISharks iqhwakele kuyona ngamaphuzu angu-16 emidlalweni emine, kulandele iLions ngangu-10, iStormers ngayisishiyagalolunye neBulls ngayisikhombisa.