Ukusungulwa kweDDC kwalivusa ekufeni ibhola laseMzansi
INGXENYE yebadlali beqembu lesizwe lika-U20 bejabulela isicoco se-Afcon e-Egypt
Image: BACKPAGEPIX
KUDELA owaziyo ukuthi ngabe selahlehla nyova laze lafika kuliphi izinga ibhola laseNingizimu Afrika ukube awuzange uqhamuke umbono wokusungula iDStv Diski Challenge (DDC) ngo-2014.
Bangaphezulu kuka-400 abadlali bebhola elikhokhelayo eNingizimu Afrika nasemazweni angaphandle abakhiqizwe yiDDC kusukela yasungulwa ngo-2014.
Iningi lalabo badlali selaphenduka izinsika emaqenjini kwiligi enkulu yakuleli, iBetway Premiership. Abanye badlala kumaligi amakhulu emhlabeni okubalwa kubona uLyle Foster owadlala kwi-Orlando Pirates kwiDDC manje usemabhukwini eBurnley FC yase-England.
UPercy Tau owagqama kwiDDC yeMamelodi Sundowns useke wadlalela iBrighton and Hove Albion kwi-English Premiership nakwi-Al Ahly yase-Egypt.
KUSUKELA kwesokunxele nguRelebohile Mofokeng, Sipho Mbule, Mbekezeli Mbokazi noThalente Mbatha be-Orlando Pirates abadlale kwiDStv Diski Challenge eminyakeni ehlukene
Image: BACKPAGEPIX
IDDC ibuyise isithunzi seBafana Bafana
Ubufakazi bobumqoka bale ligi busekutheni kubadlali beBafana Bafana abangu-23 abazongcwekisana neZambia namuhla eNelson Mandela Bay Stadium, eGqeberha ngo-3 ntambama, abangu-18 bawumkhiqizo wale ligi. Lokhu kugqamisa ukuthi yaba yisixazuululo enkingeni yokuthuthukiswa kwabadlali nokubalungiselela ukudlala ezingeni eliphezulu okuyinto eyaba yinkinga isikhathi eside eMzansi.
Kusukela kukaputeni weBafana, uRonwen Williams, kuya kwisithandwa esisha uMbekezeli Mbokazi, leli qembu lesizwe ligqishe nangoGrant Kekana, Teboho Mokoena, Sipho Mbule, Thalente Mbatha no-Oswin Appollis bonke abadlale kwiDiski.
U-Emile Witbooi (omaphakathi) nabanye abadlali beqembu lesizwe lika-Under-17 elidlala eNdebeni yoMhlaba eqhubekayo eQatar sebeke bagijima kwiDDC.
Image: BACKPAGEPIX
Kukhule awesizwe abasakhula.
Kusukela kwasungulwa i-DDC ibhola laseMzansi lilokhu likhule njalo kuzona zonke izigaba. Ngenxa yale ligi, muva nje Amajita (U/20) adle isicoco seCOSAFA Cup nese-Africa Cup of Nations (Afcon U/20) kulandelana.
Lokhu kulandelwe wukudlala kwaMajita kwiNdebe yoMhlaba ka-U/20 edlalelwe eChile ezinyangeni ezedlule kanti sikhuluma nje, Amajimbos (U/17) akwi-Last 32 yeNdebe yoMhlaba yabaneminyaka engaphansi kwengu-17 eqhubeka eQatar.
Cishe bonke abadlali obekubunjwe ngabo la maqembu bakhiqizwe yile ligi esiphenduke intandokazi eNingizimu Afrika.
ONOZINTI beBafana Bafana uRonwen Williams, Sipho Chaine noRicardo Goss bephahle umqeqeshi wabo uGrant Johnson emuva kokusiza leli qembu lingene kwiNdebe yoMhlaba. Bobathathu badlala kwiDDC eminyakeni edlule
Image: BACKPAGEPIX
Bazishaya isifuba abakwaMultichoice
“Ubufakazi bokuthi ibhola laseNingizimu Afrika likhula ngesivinini kusukela kwasungulwa i-DDC bubonwa ngisho yingane encane,” kusho uSandile Luthuli oyimenenja yeCSI yakwaMultichoice.
“Izibalo zizikhulumela zona ngakho-ke sizishaya isifuba ngesandla esisifakile ekuvuseni ibhola laseNingizimu Afrika obekungafihliwe ukuthi lihlehla nyova.
“Siyazigqaja ngesandla sethu ngokusebenza ngokubambisana ne-PSL kusukela siqala ngo-2014 kuze kube namuhla.
“Yize sijabule kodwa ngeke siyeke ukuqhubeka nokuxhasa le ligi ngoba sekucacile ukuthi ngaphandle kwayo ibhola laseMzansi lisengcupheni yokuhlehla nyova kuzona zonke izinhlaka."