U-Ouaddou ushalazela ukumataniswa nomlando kwiPirates

UMQEQESHI we-Orlando Pirates ofike kwezwakala, u-Abdeslam Ouaddou, akafuni nokuthi ikhulunywe indaba yamathuba aleli qembu okuqoqa izinkomishi ezintathu ngesizini eyodwa okwagcina ukwenzeka eminyakeni engu-13 edlule isaphekwa nguRuud Krol waseNetherlands.

Lo mqeqeshi waseMorocco ofike kwiPirates ngasekuqaleni kwesizini, usevele uyivalele ekhabetheni inkomishi yeMTN8 okwenze abezindaba bambuza ngamathuba okuqopha umlando owagcina ngoKrol owawina iMTN8, Nedbank Cup nesicoco seligi.

U-Ouaddou owadlala kwiFulham yase-England ubuzwa ngalokhu nje, ufake iPirates kowamanqamu weCarling Knockout ngokunqoba ngo 1-0 kwiRichards Bay FC ngempelasonto edlule eMoses Mabhida Stadium, eThekwini.

IPirates izobanga indebe yeCarling neqembu u-Ouaddou afika ngalo eMzansi, iMarumo Gallants, emdlalweni ozoba ngoDisemba 6 ePeter Mokaba Stadium, ePolokwane.

Ngaphandle kokudla i-MTN8 nethuba lokwengeza ngeCarling Knockout, iPirates ibhekiwe embangweni wesicoco seBetway Premiership kwazise ilele isibili lapho isele khona ngemidlalo emibili kwiMamelodi Sundowns.

ISundowns isiwine isicoco seligi enkulu yaseNingizimu Afrika amasizini ayisishiyagalombili kulandelana kodwa kulokhu kunomuzwa wokuthi ezika-Ouaddou zisethubeni lokuyiketula kule sizini.

Nakuba emakhulu amathuba okuthi iPirates izidle zontathu lezi zicoco kule sizini kodwa u-Ouaddou akafuni ukuzixaka ngokucabanga okuzokwenzeka ekugcineni.

"Kujwayelekile ukuthi uma iqembu lenza kahle kucatshangwe ukuthi selizoqhobozela kwasani olubekwa phambi kwalo kodwa iqiniso wukuthi akekho owaziyio ukuthi kuzokwenzekani," kusho u-Ouaddou.

"Ngijabule ngendlela esiyiqale ngayo isizini kodwa futhi ngiyakholelwa ekutheni sisengenza kangcono kakhulu kunalokhu esesikwenzile.

"Ukhiye wokugcina umgqigqo ulele ekutheni imidlalo siyithathe ngokulandelana kwayo kepha singazixaki ngokubuka kude ngoba lokho kungasilimaza.

"Ngiyavuma ukuthi ngaso sonke isikhathi uma singena enkundleni okusuke kusibusa emqondweni wukunqoba. Kuliqiniso nokuthi lokhu ngeke kwenzeke ngentando yethu kumbe njalo uma sifisa kanjalo kodwa kumele sikusebenzele.

"Okwamanje angiboni kungasisiza kangako ukucabanga ngesibalo sezicoco esisethubeni lokuzidla kule sizini. Okufanele sikwenze wukuqhubeka nalokhu okuhle esikwenzayo njengoba sisemgqigqweni wokuwina imidlalo."

U-Ouaddou usonge ngokuthi njengoba beya kowamanqamu weCarling nakhona bayela iwini.

"Ngikholelwa ekutheni imidlalo yamanqamu akuyona eyokudlalwa kepha ngeyokunqotshwa. Ngeke ngiqambe amanga ngikubhekile ukuwuwina umdlalo wamanqamu weCarling," kusho u-Ouaddou.