UCardoso ugxibha awePSL azibe isicelo seDowns ngeyeCaf
NGUMQEQESHI weMamelodi Sundowns, uMiguel Cardoso, ohlabe isenzo samaqembu e-PSL sokuchizela izicelo zaleli qembu laseChloorkop
Image: BACKPAGEPIX
KUSOLWE amaqembu athile adlala kwiPremier Soccer League (PSL) ngokudlalisa iMamelodi Sundowns injeje kulandela ukuziba kwawo izicelo zokusondezwa kwemidlalo yawo yeligi naleli qembu laseChloorkop ukuze lizoyidlala ngaphandle kokumpintsheka eyamaqoqo yeCaf Champions League.
Lezi zinsolo ziqhamuke kuMiguel Cardoso oyinhloko yabaqeqeshi kwiSundowns emuva kokunqoba ngo 1-0 kwi-TS Galaxy ngoLwesithathu ebusuku, emdlalweni weBetway Premiership eLoftus Versfeld Stadium, ePitoli.
NgokukaCardoso, bakhulume namaqembu amane ngenhloso yokucela ukuba kusondezwe imidlalo yabo nawo ngoba benesifiso sokukhathula ngaphambi kwekhefu le-Africa Cup of Nations (Afcon) ezoqala ngenyanga ezayo eMorocco.
UCardoso obekhombisa ukunengeka, utshele abezindaba ukuthi womane la maqembu abakhulume nawo asishaye indiva isicelo sabo okuyinto ayichaze njengokudlaliswa injeje isidingo singekho.
ISundowns incenga amaqembu e-PSL nje, izama ukucentela ukungaxinwa yimidlalo yeligi neyeChampions League uma sekuqala eyamaqoqo.
“Isifiso sethu bekuwukudlala kaningi manje ngenhloso yokuthi uma sekuqala eyamaqoqo yeChampions League sibe nethuba elikahle lokuhlelela imidlalo,” kusho uCardoso.
“Siyazethemba ukuthi sizohamba ibanga elide kwiChampions League futhi kasizidlaleli thina sodwa kepha simele izwe. Yize kunjalo avalwa ngamabomu ngisho evela amathuba okuyidlala manje eminye yemidlalo yeligi ukuze singeke sizithole sisesimweni sokungakwazi ukuphumuza abadlali.
“Sesichithwe amaqembu amane ebesicela ukudlala nawo ngeSonto, ngenhloso yokukhathula kodwa sazitshwa.
“Kubuhlungu lokhu ngoba amaqembu amakhulu e-Afrika nokuyiwona esibanga nawo kawadingi ngisho ukucela kepha amaligi awo ayazazela okufanele akwenze ukusiza kumbe ukweseka iqembu elisuke limele wona kwizwekazi."
Ngokoluhla lwemidlalo yePremiership, iSundowns izobuyela enkundleni isiyobhekana nePolokwane City ekuhambeni ngoNovemba 23. Kodwa lokho kubukeka kungeke kwenzeke kwazise kuzobe kusadlule izinsuku ezimbili leli qembu laseChloorkop lidlale neSaint Eloi Lupopo yaseDemocratic Republic of Congo (DRC) emdlalweni wokuqala wesigaba samaqoqo kwiChampions League. Ukukhala ngokungacatshangelwa kweSundowns akuqali ngoCardoso kwazise nabanye abaqeqeshi okukhona uPitso Mosimane, Manqoba Mngqithi noRhulani Mokwena, bazwakalisa ukukhathazeka eminyakeni edlule.