UBroos uphinde wabashiya abeChiefs kwiBafana

KUPHINDE kwabhimba kwiKaizer Chiefs ngesikhathi umqeqeshi weBafana Bafana, uHugo Broos, ememezela isikwati sabadlali abangu-23 esizobhekana neZambia emdlalweni wobungani ngoNovemba 15 eNelson Mandela Bay Stadium, eGqeberha.

UBroos unqamule isikwati sakhe sisuka ku-43, sehlela kwabangu-23 kodwa okungazibeki wukuthi nakulokhu akabonwa nangokhalo umdlali weChiefs ekubeni isembangweni wokuhlala esicongweni kwi-log yeBetway Premiership.

Sekunesikhathi uBroos eziba kwiChiefs, aziphendulele uma ebuzwa ngakho. Nokho muva nje ulaka lwabeChiefs luke lwehla kwazise uMduduzi Shabalala noThabiso Monyane bake babizwa.

Nakuba bekuchitshiyelwe ngabo laba badlali kodwa ifomu kaShabalala yakamuva ibibukeka sengathi ifanele wukumfaka kulesi sikwati esiyithuba lokugcina lokuthatha iso likaBroos ngaphambi kokuqala kwe-Africa Cup of Nations (Afcon) eMorocco ngenyanga ezayo.

Kulesi sikwati uBroos ufake uKeletso Makgalwa weSekhukhune United noMasindi Nemtajela ofike kwazwakala kwi-Orlando Pirates esuka kwiMarumo Gallants.

UMakgalwa obeqokelwe kumklomelo we-PSL Footballer of the Season ngesizini edlule, bese siside isikhathi uBroos ebuzwa ukuthi uzombophela nini.

UNemtajela obenganakekile kumagama abadlali abasayiniswe yiPirates, usephenduke enye yezinsika zayo kule midlalo aseyidlalele yona kusukela eyijoyinile.

Sesisonke isikwati sikaBroos simi kanje:

Onozinti

Ronwen Williams, Sipho Chaine noRicardo Goss.

Izitobha

Mbekezeli Mbokazi, Khulumani Ndamane, Khuliso Mudau, Aubrey Modiba, Samkelo Kabini, Thabiso MMoloisane noThabang Matuludi.

Abasesiswini

Masindi Nemtajela, Teboho Mokoena, Bathusi Aubaas, Thalente Mbatha noSiphephelo Sithole.

Abaphambili

Oswin Appollis, Evidence Makgopa, Tsepang Moremi, Lyle Foster, Mohau Nkota, Sipho Mbule noKeletso Makgalwa.