U-Ouaddou nerekhodi elimbeka esicongweni kwiPirates
UMQEQESHI we-Orlando Pirates, u-Abdeslam Ouaddou, osezifake emlandweni waleli qembu yize enesikhathi esincane efikile kulona
Image: ITUMELENG ENGLISH
UMGQIGQO wakamuva we-Orlando Pirates unika umqeqeshi wayo waseMorocco, u-Abdeslam Ouaddou, igunya lokuzishaya isifuba ngokwenza osekuhlule abaqeqeshi baleli qembu kusukela kwasungulwa iPremier Soccer League (PSL) ngo-1996.
Nakuba kube sengathi u-Ouaddou uqala ngebatha kwiPirates kulandela induku yeSekhukhune United neMarumo Gallants kulandelana kwiBetway Premiership kodwa lo mqeqeshi owayedlalela iFulham yase-England, usebuye wazifaka ezinhliziyweni zabalandeli.
Ngaphandle kokuqhuba "usiko" lokuwina i-MTN8, u-Ouaddou usephumelele ukwenza okwahlula uRuud Krol waseNetherlands ongowokugcina owawinisa iPirates isicoco seligi noJose Riveiro waseSpain, okungabanye babaqeqeshi ababa nempumelelo ukubedlula bonke kuleli qembu kusukela kwasungulwa iPSL.
Iwini yePirates ka 2-0 kwi-TS Galaxy maphakathi nesonto, eSoweto, bekungeyesikhombisa kulandelana uma kuhlanganiswa imidlalo yeligi, MTN8 neCaf Champions League.
Nakuba lolu hlobo lwemiphumela emihle lungaqali ukwenzeka kwiPirates kodwa u-Ouaddou ungowokuqala ukukwenza lokhu ngaphandle kokungenelwa yigoli.
Ligcine ngo-Agasti 23 ukungena igoli kwiPirates lishaywa ngu-Iqraam Rayners emdlalweni womlenze wesibili wowandulela owamanqamu weMTN8 obuseLucas Moripe Stadium, eTshwane.
Abaqeqeshi abaqavile emlandweni wePirates sebeke bayinqoba imidlalo eyisikhombisa kulandelana kuyona yonke imiqhudelwano njengoViktor Bondarenko owakwenza ngo-1999 noRiveiro okuphinde amahlandla amabili ngesizini edlule.
Umlando ukhomba ukuthi yize laba baqeqeshi bayenzela okukhulu iPirates kodwa u-Ouaddou uphumelele ukwenza okwabehlula bonke kwazise yena ukuzuze ngaphandle kokungenelwa yigoli.
IPirates inethuba lokuqhuba leli rekhodi uma isibhekene neSiwelele FC emdlalweni weCarling Knockout kusasa ngo-3 ntambama, e-Orlando Stadium, eSoweto.
Ezinhle kwiPirates wukuthi isanda kubhekana neSiwelele koweligi okuyinika ithuba nolwazi lokufanele ikulungise kwazise iwunqobe ngo 1-0 lo mdlalo obekulindelwe imbudlu kuwona.