UDladla ucacisa 'ngeyokuzitshwa' kwesokupheka iCity

UMQEQESHI weDurban City osabambile, uPitso Dladla, uphumele obala ngokunganikwa kwakhe isikhundla sokupheka leli qembu ngokugcwele. 

UDladla uzoba sebhentshini leCity njengpba izobhekana ne-Upington City emdlalweni weNedbank Cup Last 16 ngoMgqibelo ngo-3 ntambama eMxolisi Dicky Jacobs Stadium, e-Upington.

Kuzobe kungokwesithathu kule sizini ehola leli qembu njengebamba kulandela ukukhonjwa indlela kukaSiyethemba Badela emasontweni amabili adlule.

UBadela obeqashwe ekupheleni kukaDisemba, ube ngumqeqeshi wesibili kule isizini oxoshwe yiCity. Izembe likhale kuqala kuGavin Hunt ekuqaleni kukaDisemba. 

“Isimo sami sicacile eqenjini phakathi kwami nabaphathi. Angikabi nazo izinhloso zokuba ngumqeqeshi oyinhloko ngenxa yokuthi nami ngisenezami izifiso engisafisa ukuzifeza njengomqeqeshi, ngizibeke eceleni ezinye izifiso. 

Njengoba ngineziqu ze-Caf B Licence engizenze sengikuleli qembu, izinhlelo enginazo kusukela manje kuya phambili ngezokwenza izifundo ze-Caf A Licence, okwenza kube lukhuni-ke ukuthi uma ususesikhundleni sokuba ngumqeqeshi oyinhloko uhambe uyofunda,” kuchaza uDladla esithangamini nabezindaba. 

“Ngakho mina ngingumqeqeshi osabambile futhi ongenankinga nokwenza lo msebenzi uma kudingeka ukuthi ngiwenze ngoba iqembu lisathungatha umqeqeshi oyinhloko okuyinto engafihliwe.”

Mayelana nomdlalo ne-Upington, uDladla uthe nakuba belindele umdlalo onzima kuleli qembu elidlala kwiMotsepe Foundation Championship kodwa bazimisele ngokudlulela emzuliswaneni olandelayo.

“Okuhle wukuthi sikujwayele ukuya e-Upington ngoba ngesizini edlule sisadlala kwiMotsepe Champioship sidlalile nayo i-Upington City enkundleni yayo ngaphambi kokukhushulelwa kwethu kwiPremiership.

Siyabuqonda ubunzima bokuhamba amahora amaningi ngebhasi uya e-Upington. Ngakho siyabonga imizamo eyenziwe ngabaphathi beqembu, iPSL neNedbank ngokuhlela ukuthi sihambe ngebhanoyi ukuya e-Upington okuzokwenza kube ngcono kakhulu kunokuhamba ngebhasi.

Kuzoba ngumdlalo ongelula neze kodwa esizimisele ngokuwunqoba ngoba sinezinhloso zokuhamba ibanga kulo mqhudelwano.”