Amathayi kumele ahlolwe njengoba kuthwasa ihlobo

UMA kuthwasa ihlobo abantu baye behambisane nesikhathi bekhuculule izinto ukuze beqale kabusha, abakubiza nge-spring cleaning.

Lokhu akumele kugcine ekuhlanzeni indlu nokunye kodwa kumele kwenziwe nasemotweni, kakhulukazi emathayini.

Intwasahlobo iza nemvula eya ngokwanda uma sekuyihlobo nokwenza imigwaqo ibe manzi okungabeka abashayeli engcupheni uma amathayi abo engekho sesimweni.

Ungoti wamathayi kwaDunlop, uKeith Phelps, uthe abaningi abawacabangi amathayi kuze kuba khona okungahambi kahle kuwo.

“Ngoba imigwaqo izoba manzi nje, kubalulekile ukuthatha imizuzwana embalwa ubheke ukuthi amathayi akho ahlanzekile, aphephile futhi asilungele isikhathi esikuso,” kusho uPhelps.

Nazi izizathu zokuthi kungani kumele amathayi ahlolwe:

• Ukubambelela kubalulekile uma kumanzi – Amaloba adlekile anciphisa amandla ethayi okuthi akhiphe amanzi ngaphansi, bese amathuba okuthi iphaphalaziswe amanzi abe mancane.
• Umoya ukugcina uphephile – Amathayi angafuthiwe kahle anciphisa ukuthintana kwawo nomgwaqo nokuthinta indlela imoto ebhreka ngayo nokuyilawula. Amathayi afuthwe kahle akusiza wonge kuphethroli.
• Ukulimala kuyanda emvuleni – Ukuklayeka noma amapamuza kunganda esimweni esishelelayo. Ukuklayeka noma ipamuza elincane kungakwenza uzithole usupake eceleni komgwaqo ufuna usizo.

Nazi izindlela zokunakekela amathayi:

1. Awashe uwasule – Ukuhlanza ukungcola emathayini kusiza ukuthi ubone ukuklayeka nokusikeka.
2. Hlola amaloba – Zama ukuthi okungenani abe ngu-3mm ukuze ezokwazi ukumelana nemigwaqo emanzi.
3. Bheka umoya njalo ngesonto uma amathayi esabanda – Gxila kokushiwo yinkampani yemoto yakho ngokuthi kumele uwafuthe kangakanani.
4. Ungasikhohlwa isipele – Kumele sikulungele ukuba semgwaqweni njengamathayi akho ohamba ngawo.