UMoremi ufake iBucs kowamanqamu eCarling
UTshepang Moremi oshayele i-Orlando Pirates igoli eliyifake kowamanqamu eCarling Knockout.
Image: BACKPAGEPIX
I-Orlando Pirates izophinde idlale komunye umdlalo wamanqamu kulandela ukuguqisa iRichards Bay FC ngo 1-0 kowandulela owamanqamu eCarling Knockout eMoses Mabhida Stadium, eThekwini, ngoMgqibelo ntambama.
Ezimnyama beziwuphethe umdlalo esiwombeni sokuqala, iBay izama ukuvala emuva, kodwa kuyiwe ekhefini sezihamba phambili ngo 1-0 ngegoli likaTshepang Moremi.
Zigadle ngomzuzu ka-42 ngesikhathi u-Oswin Appollis ethola uMoremi kwesokunxele, wangena ngaphakathi ebhokisini ngaphambi kokushaya umgundatshani, lamudla u-Ian Otieno.
INatal Rich Boyz ibe isiqala ukuhlasela esiwombeni sesibili, isifuna igoli lokulinganisa, kodwa izinto zayo zingahlangani.
IPirates nayo iwatholile amathuba okunweba igebe kulesi isiwombe yahluleka ukuwasebenzisa, yagcina inqobe ngawo u 1-0, nokuyinto esijwayele ukuyenza kule sizini.
EzikaMagebhula sezizobhekana nelizonqoba phakathi kweLamontville Golden Arrows neMarumo Gallants kowesibili owandulela owamanqamu ozoba seKing Zwelithini Stadium, eMlaza, ngeSonto ngo-3 ntambama.