KUSAZOBA nzima kubathandi bakashokoledi njengoba intengo yawo ilokhu ikhuphuke njalo kusukela ekuqaleni konyaka.
Ongoti bezomnotho bathi kulindeleke ukuthi ushokoledi ulokhu ukhuphuka ngenxa yokuthi amazwe akhiqiza u-cocoa ase-Afrika awakwazanga ukukhiqiza u-cocoa oyisibalo esijwayelekile ngenxa yokushintshashintsha kwesimo sezulu.
Ngokolwazi olubhalwe kweminye imithombo yezindaba, ushokoledi ongu-80g, ngoFebhruwari ububiza uR22.48 manje usukhuphuke ngo-4.3%. Ngenyanga ezayo kulindeleke ukuthi uphinde wenyuke ngo-17% okuzokwenza ukuthi ushokoledi omncane, i-chocolate bar ibize uR14 kuya phezulu.
Ngokolwazi olukhona, kube nomoya omkhulu eWest Afrika odale umonakalo emasimini ka-cocoa okuholele ukuthi u-cocoa ozovunwa ube ngomncane kakhulu oseke wavunwa eminyakeni engu-14 eyedlule.
Ngenxa yalokhu, inkampani enkulukazi yaseNingizimu Afrika ekhiqiza ushokoledi, iMondelēz South Africa, engabakhiqizi bakashokoledi iCadbury, ithe ihlela ukusebenzisa ukwenyuswa kwamanani ukuze ibhekane nokushoda kuka-cocoa ongase kube nomthelela omubi enzunzweni engeniswa ile nkampani.
Isikhulu esiphezulu enkampanini ekhiqiza ushokoledi, iHershey-EO uMichele Buck, uthe: "Uma kubhekwa amanani ka-cocoa sizosebenzisa wonke amathuluzi ebhokisini lethu lamathuluzi, okuhlanganisa namanani, ukuze singalahlekelwa".
Abakhiqizi be-Lindt & Sprungli bathe bazama ukubhekana nezindleko ezikhuphukayo zika-cocoa ngesu lokuthenga ngendlela ezobavumela ukuthi babe no-cocoa omningi kunojwayelekile.
"Izindleko ezisele zidluliselwe ngokunyuka kwentengo, nentengo ephezulu ka-cocoa kuyisizathu esikhulu salokho," kusho okhulumela lo Mnyango.
Lokhu kwenyuka kuka-cocoa kuthinta ababhaki bamakhekhe nezinye izidlo ezenziwa ngo-cocoa.